الخرطوم : ون كليك نيوز
سامي دفع الله يكتب ( جغمناهم )
في قاموس حياتنا اليومية “جَغَم” معناها بسيط
شراب الموية
هل كنت تعرف انو كلمة “جغمة” بستخدموها في بعض البلدان العربية بنفس معنى رشفة الموية
بس العرب لسة ماعملوا ليها ابديت زينا
عندنا حاليا اتحولت لعلامة تجارية مسجلة باسم الدعامة
لانو نحن بقينا نستخدمها للدلالة علي القضاء علي الدعامة وخصوصا لمن يكونوا كتار زي ايام المدرعات بجوا امواج ورا امواج عايشيين علي حلمهم
الاسهل تقول جغمنا منهم كم الف كدا ساهلة زي شراب الموية
طبعا ناس التنميه البشريه عندهم مقولة حلوة كدا
حاول كتيير ماتيأس لو فشلت اليوم بكرة بتنجح
المقولة دي كانت صامدة كتييير لحدي ماجوا الدعامة ديل
و اثبتوا انو الكلام دا خطأ
لانهم حاولوا يطبقوا الكلام دا وفشلوا
كل يوم بحاولوا وكل يوم بفشلوا
من زمان زمن المدرعات وحاليا في الفاشر وبابنوسة
ولا ياربي هم ماشيين بي فهم اني لازم افشل عشان لمن افشل اكون كدا نجحت؟
خليهم يمشوا ورا حلمهم لمن يوديهم الخوور
والمدرعات دي لازم تطلع من مكانها دا لانو حيكون هنا في حقول بترول ضخمة و دي ثروات مدفونة
اما الفاشر دي حننتظر عليها شويه لانو فيها شغل مستورد كمان من كولومبيا ناس شاكيرا شاكيرا
*ناشفة شديد*
حيظل الشعب في الفاشر وفي جميع مدن السودان ماسك حبل الصبر شديد وباذن الله حيجي يوم نرجع لي جغم الموية من الزير عز العصرية في الحوش وسط العيلة.
