الخرطوم : ون كليك نيوز
سامي دفع الله يكتب : ( قصة لم تحدث ) :
في يوم كدا بعد العصرية
كنا قاعدين في الحوش بنشرب في شاي
سمعنا صوت كورااك برا البيت
الحرامي الحراامي
جرينا لقينا ولد الجيران مطارد زول لابس جلابية بيضاء وشايل ليهو كيس
الناس كلها مرقت
النسوان بالتياب
الشفع عريانيين
الرجال بالعراريق
كل الحلة عجاجا فووق
امسك الحرامي
دق الحرامي
الزعلان من مرتو بتفشي فيهو
المفلس وقرفان خاتي انو دا سبب فلسو
مرة زعلانة من جارتا شايلة مقشاشة وبتفتشف في جارتها اقصد في الحرامي
شافع ابو دقاهو شايل ليهو طوبة قال داير ياخد تارو
كلب قاعد في ضل شجرة قال كدي الننبح شوية
مافي زول فضل في الحلة ماطلع شي عكاز شي حجار وطوب وفليق زي اطفال الحجارة
الشوارع اتقفلت
الزول المسكين الما معروف هويتو دا
اتدقي دق واتخبت خبيت واترجم رجم
طلعت فجأة مرة كبيرة من بيت قريب
عاينت فيهو كويس
وقالت بصوت عالي
هييييي دا ما حرامي دا قريب ناس فلان جاهم زيارة
وكان في الدكان اشتري ليهو عيش ياهو في الكيس دا
الناس كلها وقفت
الضرب انتهي
الأصوات سكتت
والجماعة لموا روحهم ومشوا برااحة واتخارجوا
خلو صاحبنا دا مافاهم الحصل شنو ويقول غلبني كتر عليا
ناس الحلة ديل ذكروني السودانيين
اي مسؤل بتم تعيينو وبالذات لو جاي من برا الناس بتاكل حالوا دا مانافع ودا كعب ودا ماعارف حاجه عن بلدنا
وبتقطع لحمو اول من غير تشوف هو منو وعمل شنو وشهاداتو شنو وانجز شنو بتخش فيهو شمال
ومافي زول بسال عن المعايير الموضوعة شنو للتعيين وهل منطبقة عليهو او لا
طبعا اذا نجح ياهو الحلة كلها بتخش جوا بيوتهم
واذا فشل تاني بطلعوا يدقوا ويفلقوا ويضربوا ويقولوا ماقلنا ليكم
*ناشفة*
اصلا مشكلة السودان ليست في هوية من يجلس على كرسي الوزارة فقد جرب هذا الشعب جياشة ومدنيين
أحزاباً ومستقلين
شيوخاً وشباباً
كفاءة وجربندية ساكت
وما زال الوضع على ما هو عليه
إن الجذر الحقيقي للأزمة وجوهر المشكلة يكمن في
أن السلطة عندنا تدار بلا خطة بينما التنمية تحتاج إلى استراتيجيات واضحة ومؤسسات قوية وقانون صارم يعلو على الحاكم والمحكوم
لن ينهض السودان ما لم يوضع الرجل المناسب في المكان المناسب في الوقت المناسب وما لم يكن الحكم رشيدا والتنمية مخططة والقانون ملزما للجميع
أزمة السودان أزمة مؤسسات لا أشخاص أزمة قوانين لا شعارات أزمة إدارة لا خطابات وما لم نواجه ذلك بصدق سنبقى ندور في الحلقة ذاتها
*قاطعة عامة*
ما لم يعالج هذا السؤال: “كيف نحكم؟”
ياهو كل شوية حنطلع ننبذ ونفلق ونجووط مع ناس الحلة ونرجع نخش بيوتنا
مشكلة السودان ليس من يَحْكم ولكن كيف يُحْكَمُ.
