الخرطوم : ون كليك نيوز
سامي دفع الله يكتب : ( الكذب .. الحقيقة المزوَّرة )
(الكذب بنقول عليهو الكضب باللغة الدارجة السودانية)
إن الكضب هو اس الخطايا وبدايتها وهو من أقصر الطرق إلى النار كما قال النبي صل الله عليه وسلم: *((وإياكم والكذب فإن الكذب يهدي إلى الفجور وإن الفجور يهدي إلى النار وما يزال العبد يكذب ويتحرى الكذب حتى يكتب عند الله كذابا))*
الكضب مابس مجرد انحراف أخلاقي عابر دا عبارة عن جرح في صميم الثقة الإنسانية فالكلمة التي خُلقت لتكون جسراً بين العقول والقلوب بتتحول مع الكضب إلى سكين تقطع هذا الجسر وتترك الناس متباعدين حتى وهم قاعدين مع بعض
والكضب اذا بدا مابقيف لانو كل كضبة يتحتاج إلى واحدة تانية عشان تغطيها لمن تبقي الحياة كلها شبكة متشابكة من الأوهام والاكاذيب
المفارقة أن الكضب عمرو قصيير لكنه بخلي اثار طويلة الامد
يهدم الأوطان لمن يكون في السياسة ويهدم البيوت لمن يبقي عادة وبهدم النفس لمن يبقي طبيعة في النفس البشرية
في انواع من الكضب بيمارس في الحياة اليومية والناس خلاص اتعايشت معاهو
من البرلمان لحدي صالة الاعراس
*كضب الحكومات*
العيش متوفر ونحن واقفين في الصفوف
الوقود راااقد ونحن شايليين باغاتنا ومنتظرين دورنا
الجنية في افضل حالاتو وهو راقد في الانعاش ومركبين ليهو جهاز تنفس صناعي
و مافي حمي الضنك وحتي اذا بقي مافي حمي لكن الضنك رااقد
الامن مستتب وتسعة طويلة بقت ١٠ طويلة
المصيبة ما في الكضب ذاتو المصيبة في إنهم بفتكروا نحن بنصدق كلامهم وانهم ما عارفين إننا عارفين
وفي كضبات كدا بنقول عليها كضبات بيضاء مع انو كلو كضب
الكضب في *جزء من الشعب* بمارسوا وبقولوا وبعمل بيهو
بنقول جزء لانو في جزء تاني ماسك في الصدق كممارسة حياتية و كطريق نجاة
*الكضب في بيت الزوجية*
دا نوع من الكضب من اجل البقاء
زي أنتِ اجمل واحدة في الدنيا والجمال جمال الروح
وأنتَ لسة شباب مابتكبر اصلو وهو عدي مرحلة الكهولة
*قاطعة عامة*
الطالب يقول الليله مدير المدرسة ماجاء عندو وفاة وادونا اجازة والمدير في مكتبو وانت في البيت بتكضب
التاجر يقول ليك بالخسارة والله وهو ربحان ٢٠٠٪
الدكتور يقول الفحوصات كلها نضيفة وانت كوييس وهو بطمن فيهو وبهناك بجهزوا في شهادة الوفاة
المهندس يقول المبني دا مصمم يقعد مية سنة بس ماكان عامل حساب المطر
المحامي يقول جلسة واحدة وحنكسب القضية وهو عارف نهايتو اعدام
الوزير يقول المدارس جاهزة والكتب متوفرة والمعينات كلها رااااقدة والحال ياهو شايفنو مافي زول قال لينا
*ناشفة شديد*
الكضب بقي بنية تحتية للحياة اليومية عشان الحياة تمشي ويوم نجرب الصدق في كل مناحي الحياة حيحصل انقطاع تام زي البلاك اووت
*ملحوظة*
الحديث الشريف وضّح الطريق
الصدق يهدي للبر والجنة لكن نحن اخترنا الكذب لانو بديك مهلة يوم او يومين وكأنو النار مؤجلة لحين إشعار آخر.
