عطبرة : ون كليك نيوز
هذه رسالة حكاها أحد الذين جاءت بهم الحرب الي مدينة الحديد والنار نشرها أحد أبناء عطبرة البررة عن قصة امانة في زمن المسغبة لن نتدخل في نصوص القصة وننشرها كما رواها صاحبها :
أنا وأسرتي من الوافدين في عطبره ولينا الشرف طبعا نسكن عطبرة
إليوم حصل معاي موقف عمري ماحاانساه ويظل زكري للامانه اولاً والشهامه والصدق البقي معدوم في بلدنا دي
النهار واقف في الشمس معاي الوالده الله يديها الصحة والعافية في الشارع متجهين علي حي المطار مربع ١٢ الدينا مولعه نار منتظرين ركشة فجاة وقفت لينا عربيه ..
الشاب قال لينا أنا ماشي قدام إذا في طريقي اركبو أوصلكم معاي قدام الكلام دا في مربع ٢ شرق استوب البركة حي المطار
المهم ركبنا ولما وصلنا قلنا لي وصلنا قال لينا قريبين من الظلط ولا خاشين قدام علي الحله شوية قلنا لي وصلنا الحمدلله اول شارع من الظلط البيت قال لينا لو خاشين جوه اوصلكم
قلنا لي والله كتر خيرك
نزلنا وشكرناه
المهم وصلنا البيت الوالده قالت لي نسيت الكيس في المقعد الوراء الكيس دا فيهو أغراض وشنطه فيها (دهب اختي جايباهو ليها الوالده كان معاها )ما أتزكرته لحدي ما وصلنا البيت
المهم الدنيا اتقلبت وجريت الظلط بقيت واقف مافي اي حاجة انتظرت زمن مافي حاجة رجعت البيت وقلته ليهم مافي شي امي قالت لي الولد ود ناس مااظن يشرد بالدهب دا قلته ليها ربنا يجمع
سبحان الله بعد اكتر من نص ساعه تاني طلعته الظلط لقيت العربيه واقفه وفيها الشاب المحترم ابن الأصول دا قال لي أنا لي ربع ساعه واقف بقول ي رب يجي زول الحمدلله ادانا الكيس زي م هو وحلفتو اكرمو زعل وقال لي عيب لو عايز شي ماكنت جيت راجع جبته ليكم ألكيس دي قلته لي انت عارف الفي الكيس دا شنو قال لي اي عارف أنا فتحت الكيس ع امل القي مستند فيهو عشان أصلكم مالقيت جيت راجع وقفته محل نزلتكم لي ززززمن والحمدلله لقيتك في النهايه
بجد بقول ليك تسلم البطن الشالتك وربتك علي الحلال شاكر ومقدر .
الصور دي صورتها ليهو من غير م يعرف وماظاهره بس ملامح وشو يمكن الناس تعرفها هو قال من عطبره
عايزك تنزلها لانو جد دا اقل شي اعملو ليهو لي امانتو دي صراحة قال لي اسمو مؤيد ولا مهند بس أنا من اللخمة ما ركزت
فجد شكرا شكرا ياأبن الأصول
(بالمناسبه الدهب ماشوية )
الوالده طوالي قعدت تصلي وتدعي ليهو ..
