نفوق الفئران في السودان ( الكضاب نساي )

الخرطوم  : ون كليك نيوز

بالبلدي_الفصيح

غايتو أنا طوالي بنصح أي زول عاوز يكضب يركز شديد و ممكن يمشي الصيدلية يسأل من حبوب تنشيط الذاكرة عشان أثناء ما هو بكضب ما ينسى بداية الكضبة و يجيب ليهو عبارة تنسف فكرة الكضبة كلها ..

خلي كضبتك تكتمل و تاخد ليها شوية أيام معانا بعدها ممكن نحن ذاتنا ننسى كضبتك فلو جيت قلت كلام مخالف ليها احتمال ما ننتبه ..

المهم شاهدت لي فيديو لواحد شكله محترم بقوله إنو وزير معانا بيتحدث عن أن ظاهرة انتشار الفئران في شمال القضارف ظاهرة طبيعية بتحدث كل عشرة سنين (بالضبط) و ما عندها أي علاقة او تأثير على صحة الإنسان او مياه الشرب..

الله_يطمنك

وانا طبعا ما عندي طريقة غير إني أصدقه

فصراحة شكله محترم جدا و ما بشبه الناس الكضابين..

ونبرة صوته بتقول إنه واثق جدا من كلامه ..

كمان استشهد (بالمتابعين) من الاخوة المزارعين ..

لو في مزارع قال غير كدة يبقى ما متابع ..

لكن صراحة لما قال:

إجراءات السيطرة ماشة (بطريقة بخطى) حثيثة

أنا إنتبهت للتأتأة و إنه ما قادر يحدد إجراءات السيطرة بتمشى بطريقة او بخطى..

و بغض النظر عن كونها ماشة بخطى او بطريقة خطر على بالي

سؤال_تعسفي

إنه طالما هي ظاهرة طبيعية و ما عندها علاقة بصحة الناس و مياه الشرب تاعبين روحكم بإجراءات سيطرة حثيثة ليه ؟؟

الكضاب نساي .

( بلة تاج السر) .