الخرطوم : ون كليك نيوز
لما نراجع كتب التغذية ونقارنها بسفرة السحور السودانية، بنكتشف إنو أجدادنا كان عندهم وعي فسيولوجي فطري عجيب. حنلقى من أفضل الوجبات السودانية البتخليك شبعان ورويان طول نهار رمضان من غير تعب ولا فتور
الـ ( “رُقاق” بالحليب ) . ده ما مجرد سحور، ده عبارة عن وجبة متوازنة متكاملة:
لأنو علمياً : الرقاق المصنوع من القمح الكامل بيدي طاقة بطيئة التحرر وده بيمنع انخفاض السكر .
وكمان الحليب فيهو بروتين الكازين، وده بروتين “بطيء الامتصاص” بيمد العضلات بالأحماض الأمينية لـ 7 أو 8 ساعات، يعني بيمنع (هدم العضلات) أثناء الصيام.
والحليب فيهو معادن (صوديوم وبوتاسيوم) بتخلي الجسم يحتفظ بالسوائل أفضل من الموية ساي.
وممكن تستخدم الروب فعلمياً الروب أو الزبادي غني بالـ (البكتيريا النافعة). دي بتنظم حركة الأمعاء وتمنع الانتفاخ والـ (عسر الهضم) الصباحي.
كمان الزبادي الفطير بيقلل العطش جداً بسبب توازن الأملاح فيه. نصيحة مهمة عشان السحور ينجح 100%، حاول تبعد من “الشاي الأحمر” التقيل بعد السحور مباشرة.
الشاي فيه كافيين وبيعتبر (مدر للبول)، حيخليك تفقد السوائل الجبتها من الرقاق أو الزبادي بسرعة.
ممكن تبدله بـ “كركدي” بارد أو موية ساي.
