الخرطوم : ون كليك نيوز
زمان عشان تقيس ضغطك كان لازم تمشي المستشفى ويجيبوا الجهاز ويقيسوا ليك. هسي العلم لغى دا كله واختصره في خاتم صغير تلبسه في إصبعك وخلاص.
الخواتم دي دي جواها في تكنولوجيا اسمها المستشعرات الضوئية والخاتم ده من جوه فيهو لمبات “LED” صغيرة بتضرب نور (أخضر، أحمر، وتحت الحمراء) في جلدك.
النور ده لما يضرب في الأوعية الدموية، الخاتم بيشوف كمية الضوء الممتص والمنعكس. لما قلبك يضرب (Systole)، كمية الدم بتزيد، ولما يرتاح (Diastole)، الدم بيقل.
الخاتم بيحلل التغييرات دي وبيديك قراءات دقيقة جداً لـ:
ضربات القلب (Heart Rate). تشبع الأكسجين في الدم (SpO2). درجة حرارة الجسم ودي بالذات بقت دقيقة شديد وممكن تتنبأ بالمرض قبل ما تحس بالحمى!
طيب ليه الإصبع بالذات؟
علمياً، “الشرايين” الموجودة في الأصابع قريبة جداً من الجلد مقارنة بي منطقة الرسغ (محل الساعة).عشان كدة الخاتم بيديك قراءات أنضف وأدق من الساعة، وما بتأثر بحركتك كتير وأنت نايم.
طبعا أكبر تحدي كان قياس الضغط.
هسي الخواتم المتطورة بقت تستخدم خوارزميات بتقيس سرعة موجة النبض . يعني بيشوفوا النبضة أخدت زمن قدر شنو عشان تصل من القلب للإصبع، ومنها “بيحسبوا” ضغط دمك بدقة مذهلة من غير ما يضايقوك بالجهاز الـ بتنفخ داك.
