الخرطوم : ون كليك نيوز
التبريد ممكن يكون من أروع اختراعات حفظ الطعام البتساعدنا في الاحتفاظ بخصائص اللقمة الهنية ..
بس لو ما عرفنا نتعامل مع التبريد كويس ممكن يكون سبب تعاسة و مشاكل صحية خطيرة ..
أول حاجة مفروض نعرف أن التلاجة و حتى الفريزر ما بيكتلوا الجراثيم كل الحكاية إنها بتعطل نمو و تكاثر البكتريا .. الطعام مفروض يترص في التلاجة بطريقة تمنع إنتقال التلوث من طعام إلى آخر ..بعني لو ختينا اللحوم مثلا في رف علوي و خلينا تحته لبن مكشوف او سلطة الدم و السوائل ممكن تنزل عليها من اللحم و تلوثها .
الحاجة التانية ما ندفس الحاجات في التلاجة دفس ما نخلي فيها مسارات لتيارات الهواء لو عملنا كدة الطعام الموضوع في النص ما بتصله تيارات الهواء الباردة وبتكون درجة حرارته عالية تسمح للبكتيريا بالتكاثر ..
الحاجة التالتة باب التلاجة ما تلاجة ودرجة الحرارة في منطقة الباب بتكون متذبذبة و أعلى دائما من درجة الحرارة في وسط التلاجة عشان كدة الأطعمة الحساسة زي الحليب ما بنختها في الباب . ثم إنو بعد نطبخ لينا طعام ما تخليهو في درجة حرارة المطبخ لزمن طويل و بعد داك ندخله التلاجة الطعام مفروض يدخل التلاجة قبل يبرد و ندي البكتريا فرصة تتكاثر .
لو عاوزين نشيل طعام من التلاجة نسخنه و ناكله مفروض نشيل قدر حوجتنا موش كل مرة نمرق الحلة نسخنها ناكل منها و نرجعها التلاجة
الطعام اذا كنا ح نحتفظ بيهو لمدة أطول من 48 او 72 ساعة يبقى دا مكانه ما في التلاجة دا نوديهو الفريزر
والفريزر دي احسن نجيها في حلقة براها .. ولحدي الوكت داك …التاكلوها تنفعكم و تملاكم عافية ..
لقمة هنية ( دكتور بلة تاج السر) .
