طلاق في نهار رمضان.. حكايةتحبس الأنفاس

الخرطوم  : ون كليك نيوز

الووو عبدالرحيم لازم تجينى فى البيت أسسسسى

مالك يا محمود ان شاءالله خير ؟

من وين يجى الخير مع اختك ام عصيبات دى ..

يامحمود والله أنا فترت من مشاكلكم أنت وست البنات وأحميتونى شغلى لازم يكون فى حد لى تصرفاتكم دى..

صدقنى يا عبد الرحيم دى آخر مرة عشان أنا خلاص قنعت منها ومالقيت حل غير الطلاق ..ضرورى تصلنى فى البيت الآن انا منتظرك..

عبدالرحيم وصلهم لقى وش محمود مكرفس ومصرور وست البنات تبكى فى التكل والأولاد منططين عيونهم من الكاواريك ومحتارين..

محمود دخل فى الموضوع طوالى وقاليهو اسمع هنا يا عبدالرحيم ماتقعد تقول لى موال كل مره إستهدوا بالله وانتو ناس كبار والأولاد ذنبهم شنو ..

أنا خلاص اتخذت قرارى وحتى الأولاد ح اخيّرهم ..الداير يقعد معاى حبابو والماشى مع أمو يطير معاها طوالى .

تعالى يا نفيسة انتى قاعدة معاى ولا ماشة مع أمك

انا ماشة مع امى ..غورى مع أمك أصلك شبهها وتربيتها ..

وأنت يا حسين مع منو…    أنا مع أمى

يا باطل يا خائب خسارة تربيتى فيك يلا طير مع أمك ..

(محمد آخر العنقود.. الحتالة ..أبوهو بحبو شديد ومدلعو وكل طلباتو مجابه ..)

تعال يا حمودى حبيب أبوهو الولد الضكران

انت دايرنى أنا ولا مع أمك..

حمودى أخد ليهو بكيه والدميعات سالن من العيون وقاليهو بى صوت حزين انا داير أمى..

محمود قاليهو انا ذااااتى داير امك يا حمودى

لكين البمرق خالك عبدالرحيم دا من وسطنا شنو  ؟