ون كليك نيوز : الخرطوم
📌 دبوس….*البرهان يأكل الوثيقة الدستورية*….
زمان في واحدة من دول الخليج من غير تحديد…. كان في واحد من اخواننا السودانيين ساكن في سكن الشركة وشريكه في السكن كان سريلانكي بوذي الديانة….
وطبعا البوذيين ديل ناس مهذبين وتعاملهم راقي وبي يحبوا الناس ، لأن المبادئ البوذية تؤكد بشكل كبير على التعاطف واللطف والمحبة تجاه جميع الكائنات الحية، وليس فقط البشر….
اخونا السوداني دا بتاع سفسفة والسريلانكي طباخ وعنده كمية بهارات جايبها معاهو فيها قريب اطناشر علبة….
فزولنا يجيب اللحوم والخضار والسريلانكي يطبخ ويمعطوا سواء…..
بعد مدة السريلانكي سافر اجازة….
زولنا دور طبيخ براهو ويشيل ويكيل من البهارات ، وضرب للسريلانكي قال جيب معاك بهارات…..
ااسريلانكي بعد رجع فتح له واحدة من العلب لقاها فاضية…..
اتخلع ونطط عيونو وقال للسودان الحاجة ال كانت في العلبة دي وينها؟
قال له استعملتها في الطبيخ….
بس السريلانكي دق الكواريك وقعد يبكي ويتدردق في الواطة لحدي ما الناس ال في الغرف المجاورة جوا جاريين……
المهم في النهاية عرفوا انه العلبة التي يقصدها السريلانكي هي علبة كان يحتفظ فيها برماد جثة والده والسوداني اكلها……
البرهاني اقصد السوداني شتت رماد ابو زميله فوق الحِلل ومعطو….
*وفي بلدي بلد الخير والطيبة*…..
قامت ثورة ديسمبر المجيدة والتي أتت باتفاق جوبا والذي (تمخط) عما عرف ب(الوثيقة الدستورية) والتي جاءت بالفريق اول البرهان رئيسا لمجلس السيادة الانتقالي ومعه الاعضاء الموقرين منهم من قضى نحبه ومنهم من ينتظر وجابت جبرين ومناوي…..
شويتين والبرهان بالتعاون من الفلول والموزاب وجبرين ومناوي انقلبوا على الحكومة المدنية وذهب المدنيون أدراج الرياح….
وحدس ما حدس وثم اشتعلت الحرب والى أن وصلنا اليوم الى حكومة الكفوات التي يرأس وزرائها الدكتور كميل شمعون…..
بيت القصيد في الموضوع انه وبرغم مياه (الصرف الصحي) التي جرت تحت الجسر مازال الفريق البرهان شايل العلبة ال فيها رماد الوثيقة الدستورية ، كلما يعمل له طبخة يقول استنادا الى ماجاء في الوثيقة الدستورية…..
علما بأن الوثيقة الدستورية بها 78 بنداً، أبرزها هو تحديد “مدة الفترة الانتقالية ب (39) شهراً اعتباراً من توقيع الإعلان الدستوري على أن تجرى انتخابات في نهايتها……
بمعنى أن الوثيقة منتهية الصلاحية ولا يمكن تعديلها بعد انتهاء مدة ال(39) شهر….
ونحن هسع حرب سااااكت قربنا لل (39) شهر…..
حقوا البرهان يشوف له بهارات تانية غير رماد جثة المرحومة دي ، عشان تكون مبلوعة شوية…..
كفانا من رماد الوثيقة الدستورية….
ماممكن تعمل لك انقلاب أربع سنوات راقد على ضهرو زي السلحفاة منتظر زول يعدلو وتشيل وتشتت فوقه من رماد جثة الوثيقة الدستورية…..
جاتنا ستين نيلة في حظنا الهباب
ثم السلام على الغبش المظلومين ولا سلام على القتلة والظالمين…..
*ه* *ه* *ه*
📌ابووضاح📌
،،،ء،،،
