الخرطوم : ون كليك نيوز
لو بي تتذكروا ياجماعة قبل فترة ما بعيدة انتشر تسريب لي مكالمة بين محمد سيد أحمد الجاكومي رئيس كيان الشمال ووزير المعادن نور الدائم طه . أها التسريب ده كان بي يقول فيهو الجاكومي لي الراخي اضانو ود طه إنو عمك قال لي انا بذات نفسو إنو ياسر العطا ماشي وفلان داك برضو ماشي وفلتكان ماشي .. لكن العطا ح يكون رئيس هيئة الأركان .
المهم بعد تسريب المكالمة ملا الدنيا والاسافير والمنصات الجوز ده نكروا حطب وقالو ستين يمين ديل ما نحن ومرة يقولو ذكاء صناعي ومرة يقولو في زول عمل فبركة وح نشتكي وما ح نسكت. وبعد داك الموضوع صنا والناس نست الحكاية .
يقوم عمك زاتو يطلع قرار ظابط مية مية مع كلام الجاكومي والعطا يبقى رئيس أركان والناس تبدأ تسترجع كلام التسريب تاني .
غايتو في واحدة من اتنين : يا إما كلام الجاكومي النكروه حطب صح . أو الحكاية صدفه والله وحكاية ..
المهم لو ظبطت بقية الاقالات والتعيينات يبقى كده … ولو ما ظبطت كمان جماعة التسريب يشوفو المحكمة وين عشان يشتكوا صاحب الفبركة ..
ولسه شوية كمان قصة والله وحكاية .
( مراقبون عن كثب) .
