ون كليك نيوز : الخرطوم
دبوس اليوم عن حكومتنا الموغرة وحظر اتصالات الواتساب*….
وكلمة (الموغرة) في العنوان ليست خطأ املائي…..
الموغرة على وزن (مفعلة) من وغر….
وكلمة “وغْر” في اللغة العربية لها معانٍ متعددة، ولكنها غالبًا ما ترتبط بمفاهيم الغضب، الحقد، والعداوة….
يُقال “في صدره وغر” أي في قلبه حقد أو ضغينة تجاه شخص ما.
والوَغْرَة: هي شدة توقد الحر، ومنها جاء وصف الغضب والغيظ بـ”وغرة”.
والوَغْرَة (في سياق آخر): قد تعني أيضًا صوت الجيش أو جلبتهم……
المهم…..
في بداية التمانينات كنا شغالين في ترحيل العيش من الدالي والمزموم الى للمطامير في جبل موية ، ودايما بعد ما العربات تفرغ الشحنات نذهب الى موقف الشاحنات في سنار حيث مكاتب الترحيل لاستلام حساب الشحنات واستلام اوامر الشحن الجديدة…..
وعادة خاصة بالليل مايكون الموقف مزحوم بالشاحنات والسواقين والسماسرة والبياعين….
كان الموقف عبارة عن سوق كبير وشبه مهرجان…..
كان معاي مجموعة من السواقين من ضمنهم هاشم الهبوب (ابن عمتي) والسر جن (عمي اخو ابوي) ، حضرنا الى موقف الشاحنات ووجدنا عدد من الناس مجتمعين في شكل دائرة وسمعنا صوت جوطة وضحك كدا….
مشينا نشوف الحاصل شنو لقينا في نص الناس في مجنون لابس عمة فوق راسو والباقي يا مولاي كما خلقتني…..
هاشم الهبوب زول حبوب وزول واجب ولبيس وجلابياته كلها من النوع الفخم ، قام بدون تردد طلع جلابيته ومشى على المجنون عشان يلبسو ليها…..
المجنون ابو عمة رفض يلبس الجلابية….
السر جن (عمي) زول اخلاقو في نخرتو ، عندو سكين طلعها وبي نهره شديدة قال للمجنون ألبس قبل ما اوريك جنون من الله خلقك ما سمعت بيها…..
طوالي المجنون عاين للسر وشال الجلابية لبسها وقال للسر لا توريني لا اوريك وفات….
قوووووم اييييه….
حكومتنا (الموغرة) المضروبة من كل مكان وحتة وعريانة وعدمانة الستيانة قررت تحظر الاتصال الصوتي والمرئي عبر الواتساب في السودان ابتداء من الجمعة 25 يوليو القادم عشان الناس ما يتناقلوا الاخبار……
كما قال عمنا مصطفى الحاج عليه الرحمة:
البلاد غادي اتطورت
وللتقدم وضعت خطط
انتِ اصلو سحابة درت
لا خريف لا صيف لا صقط
علي النعمة قراركم دا اخير منه عمة مجنون سنار…..
ياخي اخبار شنو؟ نحن فضايحكم بنحاول ندسها من الهنود والبنغال نلقاهم عارفنها اكتر مننا….
مرة واحد بنغالي بي يكلمني عن انه الحكومة البنغالية زمان كانت تستلف من البنوك بضمان اوامر شراء من شركة ناس امين عبداللطيف للخيش البنغالي…..
قال لي بالنص : (من جات حكومة الاسلاميين خربت كل شي ووصلوا لدرجة انه عشرة سنين ما دفعوا فواتير الخيش لحدي ما المصنع وقف تصدير الخيش للسودان)……
وبروفيسور وان (Wan) ماليزي تعرفت عليه في احد المؤتمرات ، سألني عن السودان فقلت له والله انا لي عشرين سنة ما روحت السودان ، ولما عرف اني ضد النظام الحاكم حدثني عن فضائح من حكومة الاسلاميين لحدي ما خجلت …
واتساب شنو وتيك توك منو…..
ذهنية ظلامية حرامية مصاصة دماء تتغذى على السحت والمكوس واموال الغلابة…..
وهاهم يتفتق ذهنهم على حظر المكالمات عبر الواتساب ظنا منهم ان ذلك سيضطر المواطن الى اللجوء الى شركات الاتصالات التي يستخدونها كخرطوم الباعوض لامتاص دم الغلابة…..
انه الغباء بعينه…..
وقطعا هذه الفكرة لا تخرج الا من تحت (اباط) جبرين الذي يحاول ان يجد له مصادر دخل حلال كانت او حرام…..
ولكن خاب ظنكم…..
يوجد اكتر من الف تطبيق مكالمات صوت وفديو و(vpn) مبذولة في سوق التطبيقات مجانا ، ولن تنالوا من هذه الفكرة المهببة الا أن يضحك الناس فيكم وفي جهلكم ، يا أمة ضحكت من جهلها حتى البهايم….
ابقوا رجال اخرجو العصابات المسلحة من العاصمة وارجعو استقروا فيها ، بدل ما انتم نازحين زيكم وزي العزبات والعجايز
حسبنا الله فيكم…..
اللهم من شدد علينا فاشدد عليه ومن ضيق علينا دنيانا فضيق عليه دنياه نهاره وليله وراحته ونومه واكله وشربه وخروج روحه و قبره دون أن يشفع له ذلك كله في آخرته ولا ينقص من عذابه…..
اللهم آمين….
ثم السلام على الغبش المظلومين ولا سلام على القتلة والظالمين…..
*ه* *ه* *ه*
📌ابووضاح📌
،،،ء،،،
