الخرطوم : ون كليك نيوز
درجت وزارة الصحة ولاية نهر النيل على نشر تقرير يومي يبين الوضع الوبائي لحمى الضنك ولو تذكرون أنها اتبعت ذات النهج أيام وباء الكوليرا..
لكن وربما لأننا لم نتعود من الحكومة على هذه الشفافية الكلام دا ما داخل لينا في راسنا و ما مصدقين الأرقام الفي التقرير ..
طيب يا عزيزي هي الوزارة قالت حالات حمى الضنك ( المبلغ عنها عبر النظام) أكتر من 5500 البيمنعها تعترف بالف او الفين أو حتى خمسة الف تانية شنو ؟؟
عشان تقرأ التقرير بطريقة صحيحة . أول حاجة اعرف إنو التقرير المنشور كل يوم هو تقرير اليوم السابق يعني و انت بتقرأ في التقرير اليومي لو عندكم في البيت حالة جديدة ظهرت اليوم دا دي ما مضمنة في التقرير(اسأل عنها في تقرير باكر) ..
تاني حاجة اليوم بتاع التقرير بتلقاهو تحت عنوان الحالات الجديدة و بتلقاهو مفصل بالقرية أما جملة الحالات الحصلت في كل الفترة بتلقاها تحت عنوان تراكمي الحالات و بتكون موزعة بالمحليات ..
نجي لنقطة هل دي كل الحالات ولا في حالات داسنها ؟
الإجابة لا هذا ولا ذلك :
المكتوبة في التقرير دي الحالات التي وصلت المستشفيات و المراكز الصحية و اترفعت في التقرير اليومي من المركز او المستشفى ..
في حالات تانية راقدة في البيوت عشان هي حالات خفيفة او لان المريض راكب راس و ما داير يمشي المستشفى أو لأي سبب آخر أها دي مافي زول في الوزارة مطلوب منه ينوم يحلم بيها عشان ينزلها في التقرير ..
لو عندك او جنبك في حالات ضنك ما مشت المستشفى ارفع تلفونك و بلغ على الأرقام المنشورة في التقرير اليومي (طبعا ح نسألك نقول ليك طالما إنها ما مشت المستشفى الحمد إنها ضنك منو) فما تتضايق
و أخيرا : المهم ما عدد الحالات فالولاية كلها تقريبا فيها ضنك وولايات السودان كلها ضنكانة
المهم إنك تساهم في مكافحته بالتزامك بتفريغ مواعين الموية و كرشهن مرتين في الاسبوع حتى لو حلتكم ما فيها ضنك .
(بالبلدي الفصيح – دكتور بلة تاج السر) .
