الخرطوم : ون كليك نيوز
صدق أو لا تصدق: هذا السندوتش المجهري ذو الثلاث طعميات بسعر 800 جنيه .
انا معلم في الدرجة الخامسة وعندي ثلاثة اطفال في المدارس يعني 2400 جنيه سندوتشات بس . يعني في الاسبوع 12 الف وفي الشهر 48 الف جنيه (طبعا السندوتش الواحد ماكفاية لكن نعمل ايه؟)
ومرتبي 93 الف جنيه فقط : يعني الباقي 45 الف من المرتب . الشهر فيهو 30 يوم ولو قسمنا عليهو المرتب تبقى مصاريف اليوم حقت البيت 1500 جنيه
وهنا انا بوجه السؤال لسعادة الفريق البرهان واعضاء مجلس السيادة
ولسعادة الدكتور كامل ادريس واعضاء مجلس الوزراء خاصة وزير المالية جبرين .
كدي في نظركم ال 1500 جنيه أعيش بيها أسرتي كيف لأنها مابتكفينا ولا حتى برسيم ساكت لانو اقل قبضة برسيم بي 3 الف جنيه . يعني لو دايرين ناكل برسيم ورضينا بي كدا برضو ما بتكفي .
وطبعا غير قروش الاكل والشراب انا محتاج قروش ايجار البيت وانتو عارفين انو انا كمعلم من باب المستحيلات انو اكون ساكن في بيت مِلِك ولا حتى راكوبة في الخلا .
وماتنسوا كمان قروش العلاج مع الامراض الحايمة دي وخاصة امراض الاطفال وانتو اسياد العارفين انو مافي علاج مجاني في عهدكم الميمون ولا حتى للاطفال دون سن الخامسة .
وبرضو هناك حالات طوارئ زي السفريات المفاجئة وكشوفات الوفيات والاعراس وغمتات العيانين .
طبعا اللبس بتاع الشفع ده نحن بننتظرو يجينا هدية من المغتربين ربنا يزيدهم ويبارك ليهم وفيهم وعليهم
كدي فكروا معانا وادونا حل لل 1500 جنيه نتصرف بيها كيفن؟
السؤال موجه برضو لقادة النقابات والاتحادات والمدافعين عنهم بالباطل والمحرضين ضد الاضراب.
( معلم مكلوم ) .
