الخرطوم : ون كليك نيوز
سمعتا خطاب لوزير المالية قبل شوية وقال جملة خلتني اقيف شوية وهي ( كنا متوقعين الاسوأ من كده ) «الأسوأ شنو؟»
للأسف الشديد لما وزير المالية يقول «كنا متوقعين الأسوأ»، السؤال الطبيعي هو الأسوأ شنو من كده
لما الموظف لحدي الآن ما قادر يستلم مرتبه بصورة منتظمة والحد الأدنى للأجور ما بيوفر حتى أساسيات الحياة والدولار تجاوز الـ6 آلاف جنيه والخدمات وصلت مرحلة لا تحتاج لوصف والإنتاج متوقف والناس مطحونة بالغلاء… الأسوأ من كده شنو ياجبريل ؟ والأغرب من كل ذلك أن يُقال للشعب: «رغم المعاناة والضائقة المالية الشعب صابر ومتفهّم»
الناس الفيها كملت تب ولكن بعد ده كلو الشعب صابر… لكن صبر الشعب ما مفروض يكون مبررًا لاستمرار الفشل . المشكلة ما في إنو المواطن متفهم للوضع المواطن عارف حجم الحرب وعارف حجم الأزمة لكن السؤال الحقيقي: هل الذين يطلبون من الشعب الصبر والتقشف يعيشون نفس الظروف التي يعيشها المواطن؟
هل عندكم مشكلة كهرباء في بيوتكم هل عندكم مشكلة في توفير احتياجات أسركم الأصلا قاعدين خارج السودان وبتوفرو ليهم عملة صعبة عشان يعشيوا عيشة كريمة ونحنا نصبر ونصبر ونصبر وانتو غارقين في النعم .
ما ممكن تكون الدولة عاجزة عن توفير أبسط مقومات الحياة للمواطن وفي نفس الوقت يُطلب منه أن يصبر ويتحمل بينما الامتيازات والموارد لا يشعر بها إلا القليل
الفساد في الفترة دي تحديدا بقا يطمم البطن .الشعب ما محتاج كلام عن الصبر بقدر ما محتاج مرتبات موظفين توصل وتسد ليهم الحوجات الشهرية وخدمات تشتغل كهرباء وموية وقود بسعر مناسب حاليا سعر الجالون في السودان وأمريكا واحد وين المنطق هنا .
اقل شي جنيه يحفظ جزءًا من قيمته وسلعة يقدر يشتريها
السوق وصل لمرحلة كسااااااد البيع والشراء بقا مجابده
ياوزير المالية الصبر فضيلة لكن ما مفروض يتحول الصبر إلى غطاء للفشل وسوء الإدارة … هي والله المهازل متنعمين وتتطالبوا الناس بالصبر … وليس لها من دون الله كاشفة .
( مصعب الجاك ) .
