الخرطوم : ون كليك نيوز
الحرب كريهة والمثل الصيني المشهور ترجمته تقول (لا تضع البيض في سلة واحدة)
و مشهورة قصة رجل الأعمال المسافر بالباخرة و كل مرة يسأل الباخرة دي بتصل متين ؟
قالوا ليهو إنت وكت مستعجل كان تركب طيارة
قال ليهم و لو الطيارة وقعت ؟
قالوا ليهو لو يومك ما تم ما بتموت
قال ليهم يومي خلوهو .. لو تم يوم الكابتن أنا أطير وين واقبل علي وين ؟
بعيدا عن نظرية المؤامرة و كل الذي يقال من تفسيرات و تبريرات للحاصل دا .
مافي سبب واحد يخليك تعتمد على بنك الخرطوم و تطبيقه المشهور بنكك في ظل وجود عشرات البنوك و تطبيقاتها الساهلة و البتقضي كل الغرض و تنفذ كل أشكال المعاملات بما فيها التحويل لبنك الخرطوم ..
ياخ لو حصل قدر الله ساكت و حصلت مشكلة استدعت دخولك لحلها من داخل البنك فإن الدخول إلى أي فرع من فروع البنوك الأخرى أسهل خمسطار مرة من الدخول إلى أحد فروع بنك الخرطوم .
كسرة :هسة أنا ذنبي شنو إني أمشي القى بقالة بتروجايا قافلة عشان تطبيق بنك الخرطوم قافل و انا عاوز اشتري أغراضي بتطبيق رابح أو ساهل .
( بالبلدي الفصيح – دكتور بلة تاج السر ) .
