الخرطوم : ون كليك نيوز
خطبة الجمعة كانت جميلة جداً والشيخ كان بتكلم عن الفهم وعن الدين وعن الإلحاد وعن منو عندو الحق يتكلم باسم الدين والمجتمع ويطلع المنبر ويغذي عقول الناس وما كل زول حفظ ليهو كتابين مفروض يتكلم عن رسول الله حقيقي الواحد كان بسمع ومستمتع جداً .
لكن بعد الصلاة حصل المشهد البخلي الواحد يتفكر شوية زمان كان بقوم واحد ولا اتنين يطلبوا مساعدة لكن هسي الخطبة بتنتهي بتلقى رجال في نص الجامع كل واحد بحكي قصتو وبيطلب المساعدة لدرجة إنك ما قادر تستوعب العدد ولا القصص واحد عندو أطفال وما لاقي حق الدقيق وواحد عندو عملية وواحد شايل ورق وما عندو حق العلاج وواحد ما عندو حق الإيجار وواحد ما لاقي حق الوجبة المشبعة .
المشهد ده رجع لي نقاش حصل امبارح بين ناس مؤيدين للخروج عشان السيادة الوطنية وناس شايفين إنو الموضوع مزايدة سياسية وفي نفس الوقت في ناس عايزين الناس تطلع مظاهرات وكأنو مشاكل الناس دي ما موجودة يا أخوانا بالله بلاش استهبال قبل ما تطلبوا من الناس تطلع الشارع شوفوا الزول القاعد في الحلة جنبكم في الجامع حالتو شنو ما لاقي ياكل ولا عندو حق العلاج ولا حق الإيجار ولا عندو حق الوجبة البتشبعو
الناس محتاجة كلام واقعي وحلول حقيقية أكتر من الكلام الحشو البحشوه في عقولها .
خلونا من الكلام الكتير وخلو الحياة الواقعية تنفي الكلام .
زي الشغع القبضوهم الصباح سارقين قصب سكر وفي نفس الوقت البزيد السكر ويتحكم في قوت الناس مستمتع بيها وممكن يكون عندو حرس شخصي .
يلا الموكب وسير سير ياسيدي الرئيس . بي يغشوك بالمواقع والحشود المزيفة والواقع عكس ذلك .
( مصعب الجاك ) .
