الخرطوم : ون كليك نيوز
سامي دفع الله يكتب ( التعليم ماقبل التاريخ اقصد ماقبل الجامعي ) :
*الانجليزي*
كل البنعرفوا
ماي نيييم اذ
نيم مانيييم
نييييم ديك شجرة
وتجي في الكومبزيشن تكتب رحله قمت بها وطوالي علي حصه الفطور وانت مبسووط واي معاينه لي شغل تشبكهم ماي نيييم اذ ماي نيييم اذ
والغريبه دخلو فرنسي كمان
جو مابيل
*الرياضيات*
اذا كان وقفنا في الاساسيات كان كويس
جتا وظتا وقتا ومتي
وجا ومشي
يعني حسي استفدنا شنو منها في الحياة العمليه
في زول لاقتو ظا حايمه كدا ولاكدا
وتعال شوف كمان القسمة المطولة دي براها قصه كان ممكن عادي نستخدم الة حاسبه عاادي
ماضروري نعيش معاناة الناس الزمان
*التاريخ*
في سنة كده كانت كلها الدولة العثمانية وأي مشكله في حياتنا بعداك اجابتها بقت
“بسبب ضعف الدولة العثمانية”
رجل اوروبا المريض
يشهد الله مريض غيرنا مافي كوليرا وملاريا وحميات تقيله
*الحاسوب*
طبعا بتقرا تاريخ الحاسوب من لمن كان قدر الاوضه لانو نحن شعب بحب التاريخ شديد
واصلا لمن تدرسهم حاسوب لازم يكون عندك مهارة التوصيف وعند الطالب مهارة التخيل
لانو انت حتوصف ليهو الحاسوب انت قايل في حواسيب في المدارس ابسلوتلي لأ هو يالله في فصول
وكمان اذا غلطته وقته ليهو كمبيوتر هنا الطالب حيفتكر دي حصه تانيه
وقس علي ذلك باقي المواد شرح عن طريق *التخييل* الكيمياء والفيزياء
زي البتحكي لي شافع قصه عشان ينوم وفعلا اغلبيه الطلبه بتكون نايمه نوم جد خاصه اذا ضاربه فوول او بوش
اما ناس ملبسنا ديل غايتو كان فيهم فايدة ياهو بنخيط حسي هدومنا المقطعة الفضلت بعد الحرب ومسكننا الله ياذاهم الدعامه بقي مسكنهم هم وشلعوهو ونهبوهو
وعموما احلي شي لمن يكون في تسميع او اسئله فجاءة الاستاذ بكون واثق من عدم اجابتك فبكون في اربعه شادنك فوق حتي هو يبدأ يسأل ومع اخر حرف من السؤال انت بتكون في السوط التاني
اقصي استفادة من التعليم انها علمتنا القراءة و الكتابة
بجد والله
خسارة الدق الدقونا ليه في الحاجات دي
