الخرطوم : ون كليك نيوز
بعيدا عن عوار فكرة مراكز البيع المخفض التي تقيمها إدارة الشؤون الاقتصادية بولاية نهرالنيل.. و بعيدا عن أنها فكرة تقليدية معيبة (ح نجيها مرة تانية)
هسة ح نشرح ليكم كيف إنكم ممكن تقعوا ضحية لافتة مكتوب عليها البيع بالتخفيض ..
أول مدخل ممكن يخليك تتخدع
إنت عارف جدا إنو الأسعار زائدة شديد لكن طبعا ما عندك فكرة عن سعر كل سلعة يعني ممكن تكون عارف سعر السكر و اللحم لكن ما عندك فكرة عن سعر الجبنة و التوم و لبن البدرة ..
المدخل التاني إنك بسبب الظروف الاقتصادية او غيرها حتى الحاجات البتشتريها كل يوم متعود تشتري كميات صغيرة و يمكن تكون بدون وزن يعني بتمشي تشيل ليك زيت بألفين و كوم بامية و صلصلة بالف لكن ما سألت نفسك الزيت البتشتريهو دا يعادل كم من اللتر و لا فكرة كوم البامية دا فيهو كم جرام ولا علبة الصلصة بتجيب ليها كيس قدر البتشتريهو بالف جنيه..
المدخل التالت : انت عندك قلق دائم و خفة قلب و شبه يقين بأن الأسعار في السوق (الانت ما عارفها كم) بكرة حتزيد و عادة مراكز البيع المخفض بتكون شغالة لفترات محدودة جدا مهما طالت .
كدة انت بقيت صيد جاهز ممكن لافتة مركز بيع مخفض تجهجه باكاتك ودعاية عن مركز بيع مخفض ممكن تخليك ترقص طربا خاصة لو الدعاية متولياها الحكومة تحت شعارات الإهتمام بمعاش الناس (لأنك طبعا مفتكر نفسك من الناس المهتمة بمعاشهم الحكومة)
اها يا سيدي نجي نوريك بغشوك كيف اعتمادا على المداخل الذكرناها فوق دي .اول حاجة دعاية كثيفة و ضخمة قبل فترة بأن هنالك موقع للبيع المخفض سيتم افتتاحه (فرصة ما بتتعوض) ممكن تتسلف قروش عشان ما تفوت الفرصة . وح تمشي عشان تشوف الأسعار و ح تركز على الحاجات الانت عارف سعرها في السوق و بتشتريها طوالي تلقى سعرها أقل من السوق تطمئن و تسترخي و تستعدل للحقنة ..
تمشي للحاجات البتشتري منها (قدر ظروفك) بدل كوم البامية تلقاها معروضة بالكيلو و بدل الزيت في الكيس ح تلقى عبوات كبيرة و بدل كيس الصلصة المعروض علب صلصة او كراتين . ولانه عقلك خلاص اتشفر على أن كل المعروض في المخيم دا ارخص من السوق ما ح ترجع عشان تسأل هي الحاجات دي في السوق بكم؟
أما الحاجات الاصلا ما قاعد تشتريها زي الكبكبي(اخر مرة لاقاك في رمضان) يبقى دي فرصة تشيل ليك ربع او ربعين (كيلة) . المهم ح تطلق العنان لنفسك اليوم و تخليها تمد شهوتها على قدر ما فتح الله عليك به من قروش (اصلا القرش الأسود مدخور لليوم الأسود و اسود من أيامنا دي ماحصل) .
بعد تكمل قريشاتك و القريشات الاتسلفتهن و اشتريت حاجات أكتر من حوجتك الفعلية لو مشيت قارنت سعر السلة المرقت بيها من المخيم مع الأسعار في السوق ح تلقى إنك اشتريت السكر و اللحم بأقل من سعر السوق عشرة مرات لكن في المقابل دفعت في باقي محتويات السلة مبلغ أعلى من السوق بما يذهب عليك فرحة الحصول على السلة و يندمك على اليوم الدخلت فيهو المخيم ..
طبعا في كتير من الأحيان بتحصل حاجة تجيب ليك الدغت و السكري وهي إنك تكتشف إنك و بأسعار عالية اشتريت أردأ الأصناف(البايرة المافي زول بشتريها) أو إنك إشتريت مواد منتهية الصلاحية او على وشك الانتهاء (تموت عندك انت بدل تموت في الرف) .
(دكتور بلة تاج السر) .
