الخرطوم : ون كليك نيوز
سامي دفع الله يكتب : ( ترسـانة الأم السـودانيـة )
اليد … ودا سلاح متعدد المهام و من الاسلحة التي تستخدمها الام السودانيه كتييير في البيت
اليد وهي منبسطة حيكون في لطيش جد وهي منقبضة بتضوق قرييص جد وخصوصا البتكون في الكلوة لمن تخليك تقوم علي حيلك
الأسلحة الخفيفة
وايضا من الأسلحة المستخدمة عند الامهات
الشبشب ودا عبارة عن صاروخ ارض ارض قصير المدى دقة الإصابة تعتمد على مهارة التوجيه طبعا لمن تقول ليك مد لي الشبشب دا الحركة دي بتدل علي بداية المعركة والحلوة بعد يفنوك بيهو بقولوا ليك جيبو راجع
المقشاشة ودي من الاسلحة بعيدة المدي خصوصا اذا كانت الام بتنشن كويس
أسلحة الدمار النفسي
النحنحة في الصلاة
ودي قنبله صامته لكنها فعالة
تحميرة العين ودي بتجمد الدم في العروق
في كمان عض الشلوفه ودي بتترك اثر استراتيجي
ودي كلها اسلحه تهديدية ونفسية
وبرضو هناك العقوبات
الليله مافي العشاء نومو كدا
طلعة مافي تلفزيون مافي
ودي اسلحة جسدية نفسية مؤلمة
وفي برضو الكمائن
ودا نوع الام البتدفنها ليك
زي لمن تجي تسرح بنتها وبالمشط في الرقبه
او لمن تقبضك تجضمك جضييم
وعليه تعلن القيادة العليا للامهات ان اي محاولة للتمرد داخل البيت سيتم التعامل معها بكافة الوسائل المشروعة وغير المشروعة وننصح الأبناء بالاستسلام السريع عند أول سماع لجملة (يا ولد تعال هنا)
*ملحوظة*
الام هي القائد الأعلى للقوات المسلحة المنزلية وقراراتها نهائية وملزمة واي اعتراض من الأبناء يعتبر تمردا ويعاقب عليه فورا ويظل الأب مراقباً صامتاً ويُستدعى فقط في حالة الطوارئ ومهمتة التامين اللوجستي (دفع المصاريف)
وسلاحه الوحيد هو الجملة الشهيرة امك قالت شنو؟
