الخرطوم : ون كليك نيوز
سامي دفع الله يكتب : ( رومانسيات سودانية )
واحدة من دولة السودان الشقيقة حضرت ليها مسلسل تركي الراجل قال القهوة سكرها بسيط داير زيادة سكر قالت ليهو حقعد قدامك حتبقي مزبوووطة
هي بعد شافت المشهد حبت تعمل زيو بس زادتو بهارات
جابت كوبايه شاي خالي سكر ختتها لي الراجل
الراجل قال ليها الشاي دا مسيخ
جيبي سكر قامت دخلت صباعها في الشاي وساطتو نظام انا سكر
الراجل هاج قرف يقرفك بي صباعك كمان حسي ماكنتي بتنضفي في كمونية وبعديها غسلتي المواعيين وهدوم الشفع الوسخانة.
*الخلاصة*
سكر قاعد في البيت ختي مع الشاي
سكر ماقاعد في البيت ماتعملي شاي
———‐——————————————————-‐–،—
واحد من دولة السودان الشقيقة حضر ليهو مشهد في فلم المرة تعبانة في شغل البيت الراجل حبة يرفع من معنوياتها فقال ليها احبك فوق المحبة حباا المرة انبسطت واشتغلت شغل زي حصان كارو محمل ليهو سيخ من سوق السجانه موديهو جبرة
المهم صاحبنا حبة يعمل زي المشهد
لقي المرة شغاله في المطبخ وبتعوس
قال ليها فلانه احبك فوق .. ومالحق تم الجملة زاتو قالت ليهو دي قلة ادب جديدة ولا شنو؟
*الخلاصة*
المرة اذا شغالة اخلاقها بتكون في نخرينها ماتتكلم معاها نهائي
واذا ماشغالة برضو اخلاقها في نخرينها منك فما تتكلم معاها نهائي
‐———‐—————–‐——————————-‐———–
شفع من دولة السودان الشقيقة شافو مشهد رومانسي برضو في مسلسل انو يعملوا مفاجاءة لي امهم ويحضنوها كلهم عشان يفرحوها
المهم الشفع حبوا يطبقوا المشهد مع امهم فقاموا انتظروها وهي داخلة من الشغل وفترانة وزهجانة فقاموا كلهم اتلموا فيها وحضنوها
الام فجاءة قامت تصرخ المات منووو ابوكم ماات؟
*الخلاصة*
قبيل قنا المرة لمن تكون شغالة او ما شغالة شنووو *مانقرب منها*
*خلاصة عامة*
الرومانسيات في دولة السودان الشقيقة تنتهي بانتهاء مراسم العقد بعديها تلوك الصبر مع القرض بس.
