الخرطوم : ون كليك نيوز
سامي دفع الله يكتب : ( مشهد رومانسي تخيلي )
واحدة حصلت ليها مشكله في العربيه واتصلت بي راجلها عشان توريهو ويشوف ليها حل
– الووو الحقني يابيبي في مؤشر حصل الاحمر والعربيه طلع منها دخان
= شنوو قتي شنو ماسامع كنت نايم دخان من العربية ضربتك مسيرة ؟
ـ مسيرة شنو يابيبي في دخان طالع من المكنه
= كبيتي ليها موية قبل تتحركي؟
– موية؟ مويه شنو هي بتشرب موية؟ انت ماجبت لي سيرة موية قته بنزين بس
= كبيتي بنزين في مكان الموية؟
– ماسمعتك قته شنوو ؟ انا حسي بطلتها ومؤشر السخانة رجع مكانو الحمدلله المشكله اتحلت
= مشكلة شنو الاتحلت اوعي تدوريها تاني
– اها اعمل شنو؟
= افتحي الكبووت
– قتة شنو انا حلوة وكيووت شكراا يابيبي
= افتحي … الكبوت ماتخليني اسب ليك .. الكبوت عشان تكبي لي العربية موية عشان تبرد
– فعلا الجو حاار ماممكن ارش ليها مويه من برا؟
= يرشك ثنائي بتاع دعامة ان شاء الله افتحي الكبوت الفيهو المكنة
– مكنة شنو؟
= لا اله الا الله مكنة العربية
– هي العربية فيها مكنة؟
= لاحول ولا قوة الا بالله
– ماشاء الله بقيت بتذكر الله كتير
= اللهم لانسالك رد القضاء ولكن نسالك اللطف فيه
حولي المكالمة لي فيديو عشان اوريك تفتحي الكبوت من وين
– داير تشوفني كويس شغلتها اها رايك شنو طالعة عسل صاح؟
= اقلبي الكاميرا يقلب كيانك اعمليها الخلفيه نحن حسي في الكبوت
– ماتكورك فيني انا كدا بتوتر
= انا الغلطان الخلاني اعلمك تسوقي شنو
– اها ياتو واحد بفتح الكبوت .. دا؟
= لا دا بتاع البنزيين؟
– هي دا مابتاع البنزين .. البنزين التحت اول واحد بخت فيهو كراعي اليمين
= اللهم اجعلنا من اصحاب اليمين
– اسهل ادورها واجيبها ليك انت اتصرف
= اذا دورتيها المكنة حتسيح
– ليها حق دي سخانة تسييح البني ادم
= انت طلعتي لشنوو؟
– طلعت الاقي سمر امها ولدت
= سمر صحبتك القدرك امها ولدت؟
– ااي والولد سمو سامر
= سامر وسمر انا مالي بالقصة دي؟؟؟
– خلاص حخلي ليك العربية الحق ام سمر اودي ليها الهدية
= هدية شنو؟
– شلت من دولابك قروش اشتريت ليها خاتم ١٠ جرام
= ديك العدة كان خلو وسخ العدة وكان هشو كسر العدة
– بتقول في شنو يابيبي؟
= اللهم اني مسني الضر وانت ارحم الراحمين
