الخرطوم : ون كليك نيوز
سامي دفع الله يكتب ( السودان زحمة في كل مكان )
مشيت اجدد الجواز السوداني في دولة قطر في دوحة الخير عندهم حاجة اسمها مجمع السفارات اغلبيه السفارات موجودة هناك بتدخل بتركب بصات مجانيه بتلففك علي كل السفارات تشوف سفارتك الماشي ليها شنو وتنزل شغل منظم ومرتب لمن يحسسك بي حاجه غلط لانو ماعندنا حاجه بتمشي ساهلة وسريعه وخصوصا اذا ماشي لجهة حكومية المهم الواحد متفائل خير ومستبشر لمن وصلت السفارة السودانيه طبعا قصادها طوالي السفارة اليابانية وديل بحسسوك انهم ماشغاليين مافي اي ناس ومافي اي صوت بس اكتشفت انهم شغاليين بس بي حجز الكتروني ومواعيد مافي ناس بتنتظر وزحمه وقصص زي دي
اتلفت علي سفارتنا الحمدلله ماخيبت ظني بتحس انك جوا السوق العربي صف وزحمه مدفق في الشارع وشويه كدا نخش السفارة اليابانية
مجمع السفارات كلو صااااااني الا السفاره السودانيه قبل ما تدخل بتسمع الجوطه والكواريك
نفس الهمجية ونفس الزحمة ونفس الطوابير نفس الإجراءات الما معروفة بتبدا وين وتنتهي وين
بيت عرس بس
وموظفه القروش ناس التوب الابيض ديلاك المن تشوفهم بطنك تطم واصلا لسه ماجات وبعديها ساعه كدا عشان تجي وعشان تستعد وتفتح الكمبيوتر وتنتظر جمله الشبكة طاشة وانت اخلاقك وصلت الحد
وكمان كراسي زي كراسي مستشفي الخرطوم التعليمي ودا اذا لقيت كرسي فاضي اصلا
وحاجه تانية نحن السفارة الوحيدة البتمشي ليها شايل كاش كل السفارات بتدفع بالبطاقة حتتفاجأ انهم دايرين كاش ولازم تركب البص وتطلع تاني برا مجمع السفارات عشان تفتش صراف الي شكلو كدا لازم نكون متميزين ومتفرديين عن باقي السفارات والشعوب.
طبعا المرة اللابسة توب ابيض دي بتاعت كلو
اي قروش بتدفع عندها
جواز رقم وطني شهادة ميلاد توثيق شهادات اي شي عندها وماشاء الله ماعندها طوله بال بفهم انت الجيتنا في السفارة ولانحن الجيناك في بيتكم
وكلما زاد عدد الناس الجابين السفارة قل عدد الموظفيين الشغاليين
تناسب عكسي اصلا معكسه في اي حاجة والرسوم طبعا بتاعت الجواز تقول داير تدفع حق مفاعل نووي 931 ريال زي مليار جنيه كدا
بعد تنتهي وتمشي تتصور يلا بعد دا انت محتاج صبر ايوب لانو حيجي متين مامعروف ومافي زول برد علي تلفون واصلا استلموا قروشهم تاني البشتغل بيك منو تنتظر بس
ومحتاج تاخذ اذن يوم كامل من الشغل عشان تمشي ليهم
وماعارف هل في مكيفات شغالة ولا دي من الزحمه الشديدة لانو لازم تتهبهب من الكتمة
ياوزارة الخارجية بنطالب بي انو يكون قدام سفارتنا ستات شاي وناس بتبيع تسالي وفول وسندوتشات طعمية وبيض وليمون وكركدي وغساليين عربات وناس بتبيع شواحن ووصلات وموية برد ودكوة وويكة وصعوط وركشات طرحة وناس درداقات حايميين واقطعوا الكهرباء مرة مرة كدا عشان تكتمل اللوحة الوطنية الخالصة دي ونحس اننا في قلب الخرطوم مع اخوتنا وحبايبنا
لانو كلما نشتهي ريحة الوطن بدل نقطع تذكرة ونرجع الخرطوم نمشي السفاره بس
شكرا السفارة السودانية في قطر عشان بتهمك مصلحتنا ولانك مرآة الهوية السودانية ولازم تحافظوا على العادات و التقالييد السودانية التلييدة الراسخة دي حقيقي والله
لازم نحس بنكهة الوطن خارج الوطن
ماعارف وضع بقيه السفارات في باقي البلدان شنو لكن شكلو كدا الحالة واااحدة
وشكلو كدا اي حاجة جوا السفارة سودانية خالصة الا *(الرواتب)* اكييد مابقبضوها بالسوداني
قدر م تقول طلعت من السودان تلقى السودان م طلع منك
بحبك يا سودان.
