الخرطوم : ون كليك نيوز
مع تزايد كثافة بعوض الايديس و اتساع دائرة تفشي وباء الضنك تتعالى الأصوات منادة بتنفيذ حملات رش بالمببدات و يمكن في مناطق أهلها مشوا اشتروا مبيدات براهم و رشوا مناطقهم ..
يؤسفني أن أقول أن حملات الرش بالمبيدات هي أقل أساليب المكافحة فائدة و أعلاها تكلفة ..
ودا ضياع زمن و إهدار موارد لا يحقق الغاية المطلوبة
ليه و كيف الكلام دا؟
طيب مقارنة بسيطة بين بعوض الانوفليس الناقل للملاريا و بعوض الايديس الناقل لحمى الضنك و طرق انتقال المرضين ..
بعوض الانوفليس بيضع البيض و يفقس ويكمل دورته حتى طور الحشرة الكاملة تقوم الأنثى تمشي تتغذى على الدم ونفرض إنها اول ما عضت ليها زول كان عنده ملاريا
بتمشي ترتاح لحدي ما طفيل الملاريا يكمل دورته داخل جسمها و تمشي تلدغ ليها زول تاني تنقل ليهو العدوى ..
بالطريقة دي لو أنا نفذت حملة رش و كتلت البعوض الطائر بكون كسرت حلقة إنتقال المرض ..ولحدي ما تفقس بعوضة تانية وتمشي تكرر الدورة دي دايرة ليها قريب شهر ..
نجي لبعوض الايديس الناقل لمرض الضنك او غيره من الأمراض البعوضة دي بتضع البيض وهو حامل للفيروس واول ما يبقى حشرة كاملة ويعض اول زول بينقل ليهو المرض …يبقى انا لو نفذت الحملة و كتلت كل البعوض الطائر البعوض البطير تاني يوم ح يواصل نقل المرض و حلقة انتقال العدوى ما انكسرت ولا انقطعت و الوباء ح يستمر دون إنقطاع..
الحل شنو طيب ؟ ..
الحل البيض و اليرقات الحاضننهم في براميل مويتنا و ازيارنا و صهاريجنا و مكيفاتنا وووو ما يطير ..
نشتغل كلنا تفريغ لأواني حفظ الماء و تجفيفها و كرش جدرانها بليفة خشنة او فرشاة قوية عشان نكسر البيض و نفجخ اليرقات ..ونضيف على ذلك تصفية المياه بقطعة قماش نضيفة عشان لو فيها بيض او يرقات نعزلهم من الموية ..
نغطي مواعين حفظ الموية بإحكام عشان البعوض ما يلد لينا فيها ويخت لينا فيها بيض حامل للمرض
لو كررنا الحاجة دي لمدة أسبوعين الوباء بينحسر بشكل مدهش و نرتاح من حمى الضنك … تاني إلا تجينا موجة بعد الخريف ..
الخلاصة حملات الرش ما حل ..الحل تجفيف .. والحمى تقيف …
( دكتور بلة تاج السر) .
