الخرطوم : ون كليك نيوز
ﻣﻊ ﺍﻗﺘﺮﺍﺏ ﺑﺪﺍﻳﺔ ﻓﺼﻞ ﺍلصيف ، ﺗﺒﺪﺃ ﻃﻼﺋﻊ الهجرة العكسية للطائر ﺍﻟﺠﻤﻴﻞ ﺍلأﻧﻴﻖ ” ﺃﻡ ﻗﻴﺮﺩﻭﻥ ” ﻓﻲ مغادرة ﺍﻟﺴﻮﺩﺍﻥ، وتبدأ البحث عن ﻣﻮﻃﻦ ﻫﺠﺮﺗﻬﺎ ﺍﻟﺸﺘﻮﻱ الجديد .
ﻭﻫﻲ ﻓﻨﺎﻧﺔ ﻭﻟﻬﺎ ﺍﺳﻠﻮﺏ ﻣﺘﻤﻴﺰ ﻭﻓﺮﻳﺪ ﻓﻲ ﺍﻟﻬﺠﺮﺓ، ﻓﻬﻲ ﺗﺮﻛﺐ ﻋﻠﻲ ﻇﻬﺮ ﻃﺎﺋﺮ ﺍﻟﺮﻫﻮ ﻭﻫﻮ ﻳﻨﺘﻈﺮﻫﺎ ﺣﺘﻰ ﺗﺠﻬﺰ ﻭﻳﺤﻤﻞ ﻋﻠﻰ ﻇﻬﺮﻩ ﻋﺪﺩﺍ ﻣﻨﻬﺎ ﻭﻳﺘﺤﺮﻙ ﺑﻬﺎ ﻋﺎﺑﺮﺍ ﺍﻟﺒﺤﺎﺭ ﻭﺍﻟﻮﻫﺎﺩ، ﻭﺫﻟﻚ ﻳﺆﻣﻦ ﺍﻟﻤﻨﻔﻌﺔ ﻟﻠﻄﺮﻓﻴﻦ، ﻻﻧﻬﺎ ﺗﺤﻔﻆ ﻟﻪ ﺍﻟﺠﺎﺫﺑﻴﺔ ﻓﻲ ﺍﻟﺒﺤﺮ؛ ﻳﺎ ﺳﺒﺤﺎﻥ ﺍﻟﻠﻪ ..
أﻫﻠﻨﺎ ﺑﻘﻮﻟﻮﺍ أﻡ ﻗﻴﺮﺩﻭﻥ ﻣﺸﺖ ﺍﻟﺤﺞ ﻭﻋﺸﺎﻥ ﻛﺪﺍ ﻳﺴﻤﻮﻧﻬﺎ ﺍﻟﺤﺎﺟﺔ ﻭيغنوا ﻟﻬﺎ ﺍﻻﻃﻔﺎﻝ ﻭﻫﻲ ﺗﺮﻗﺺ ﻓﻲ ﺿﻞ ﺍﻟﻀﺤﻲ ﺗﺠﺮﻱ ﻭﺗﻘﻴﻒ وﺗﻬﻮﺯﺯ ﺿﻨﺒﻬﺎ ..
ﺃﻡ ﻗﻴﺮﺩﻭﻥ ﻳﺎﺍﻟﺤﺎﺟﺔ
ﻓﻲ ﻛﻞ ﺳﻨﻪ ﺩﺍﺟﻪ
ﺃﻡ ﻗﻴﺮﺩﻭﻥ ﻳﺎﺍﻟﺤﺎﺟﺔ
ﻭﻟﺪﻙ ﻭﻳﻦ ﺭﺍﺡ ﻳﺎﺍﻟﺤﺎﺟﺔ
ﺷﺪﻱ ﺍﻟﻨﻮﺍﺡ ﻳﺎﺍﻟﺤﺎﺟﺔ
ﻟﺤﺪﻱ ﺍﻟﺼﺒﺎﺡ ﻳﺎﺍﻟﺤﺎﺟﺔ
( ﻋﻨﺪﻫﺎ ﺗﺘﻮﻗﻒ ﻋﻦ ﺍﻟﺮﻗﻴﺺ ﺣﺰﻧﺎ ﻋﻠﻲ ﻭﻟﺪﻫﺎ ) ﻓﻴﻐﻴﺮﻭﺍ ﻟﻬﺎ ﺍﻻﻏﻨﻴﺔ ﻟﻜﻲ ﻴﺘﺤﻮﻝ ﺣﺰﻧﻬﺎ ﺍﻟﻰ ﻓﺮﺡ، ﻭيقولوا..
ﺍﻣﺸﻲ ﻣﺸﻴﻚ ﻳﺎﺍﻟﺤﺎﺟﺔ
ﻭﻟﺪﻙ ﺑﺠﻴﻚ ﻳﺎﺍﻟﺤﺎﺟﺔ
ﻭﻟﺪﻙ ﻋﺮﻳﺲ ﻳﺎﺍﻟﺤﺎﺟﺔ
ﺗﺤﺖ ﺍﻟﺪﻓﻴﺲ ﻳﺎﺍﻟﺤﺎﺟﺔ
ﺑﺎﻟﻘﺮﻣﺼﻴﺺ ﻳﺎﺍﻟﺤﺎﺟﺔ
ﻭﻟﺪﻙ ﺑﺠﻴﻚ ﻳﺎﺍﻟﺤﺎﺟﺔ
ﻣﻦ ﺍﻟﻤﺮﺍﺡ ﻳﺎﺍﻟﺤﺎﺟﺔ
ﻓﺘﻮﺍﺻﻞ ﺭﻗﻴﺼﻬﺎ ﺍﻟﺠﻤﻴﻞ،
وبعد تركب ﻃﻴﺮ ﺍﻟﺮﻫﻮ وﻳﻮﺩﻳﻬﺎ ﻣﻜﺔ ﺗﺤﺞ ﺑﻴﺖ ﺍﻟﻠﻪ ﺍﻟﺤﺮﺍﻡ ﻭﺗﺠﻴﻨﺎ نقوم نغني ليها ..
ﺍﻟﻘﻴﻨﻘﺮﺩ … ﻳﺎ ﺍﻟﺤﺎﺟّﻲ
ﺑﺖ ﺍﻟﻤﻠﻴﻚ … ﻳﺎ ﺍﻟﺤﺎﺟّﻲ
ﺣﺞ ﺍﻟﻠﻪ ﻋﻠﻴﻚ … ﻳﺎ ﺍﻟﺤﺎﺟّﻲ
ﺩﻭﺩﻙ ﻭﺭﺩ … ﻳﺎ ﺍﻟﺤﺎﺟّﻲ
ﺑﺤﺮﻙ ﺷﺮﺩ … ﻳﺎ ﺍﻟﺤﺎﺟّﻲ
ﻭﻟﺪﻙ ﻋﺮﻳﺲ … ﻳﺎ ﺍﻟﺤﺎﺟّﻲ
ﻳﻮﻡ ﺍﻟﺨﻤﻴﺲ … ﻳﺎ ﺍﻟﺤﺎﺟّﻲ
ﺟﺎﺑﻠﻚ ﻗﻤﻴﺺ … ﻳﺎ ﺍﻟﺤﺎﺟّﻲ
وكل عام وانتوا طيبين .
(منذر أحمد الحاج ) .
