الخرطوم : ون كليك نيوز
أهلنا بقولوا فلان دا جمل شيل على سبيل المدح
جمل الشيل دا شنو و فرقو شنو من باقي الجمال ؟
ليس كما يخطر لك عزيزي القارئ فالأمر لا يتعلق بالقوة البدنية ولا الصبر و قوة التحمل فكل الجمال تقريبا تحمل هذه الصفات ..
جمل الشيل دا جمل يتم إنتخابه و إعداده عشان يبقى جمل شيل لما نكون راحلين نحمله العفش و الأطفال و صغار البهم و قرب الموية
الجمل البشيل ديل كلهن و يوصلن سالمات لازم يكون رزين و راسي و مشيهو هادي
جمل الشيل لازم يكون ثابت ما بينخلع لو نطت قدامو أرنب او شاف ليهو حاجة او سمع ليهو صوت فجأة
لو حصل طارئ جمل الشيل بيتصرف بي حكمة و عقل
الإبل معروف عنها إنها حقودة و حريصة على الانتقام لكن جمل الشيل عندو ثبات إنفعالي لو لاقاهو غريمه بيتذكر إنو شايل ليهو أمانة غالية ما ح يتصرف بشكل يخليهو يرمي الشيلة ويضيع الامانة
جمل الشيل ما ممكن تقوده الغرائز الفطرية و ينساق وراها ينسى الشيلة
جمل الشيل هين و لين متواضع .
المهم :
لما يقولوا ليك عاوزنك جمل شيل ما معناها عاوزين عضلاتك مفتلات ولا جيبك منفوخ دي حاجات ساهل انو يلقوها او يستبدلوها
لكن عاوزنك جمل شيل معناها عاوزنك عاقل رزين و ثباتك الانفعالي عالي متواضع و متسامح و حكيم
بإختصار عاوزنك إنسان
وباختصار أكتر البلد عايزا ناس يكون جمال شيل .
( بالبلدي الفصيح : بلة تاج السر ) .
