الخرطوم : ون كليك نيوز
هم أساتذة الجامعات باكر مضربين ليه؟؟
لو إنت زي وزير التعليم العالي فاهم إنهم عاوزين زيادة مرتب و خلاص يبقى إنت ما فاهم القضية فتعال نشرح ليك ..
باختصار شديد من سنة 65 و أساتذة الجامعات مطالبين بهيكل استثنائي ولائحة شروط خدمة خاصة..
الموضوع دا كل مرة يفتحوهو و يقفلوهو يتقدم خطوة و يتراجع خطوة ..
لحدي ما جاء القانون الاطاري للخدمة المدنية لسنة 2018 إستثنى أساتذة الجامعات و عدد من منسوبي المهن الأخرى من الخدمة المدنية و أصبح مافي قانون او لائحة تحدد حقوق وواجبات الأستاذ و أسس محاسبته..
الأستاذ الجامعي هسة لو قصر و عاوز تحاسبه او اشتغل وعاوز تكافئه ما عندك لائحة تستند عليها إلا تشتغل عكيم ساكت او تشتغل معاهو بالعرف السائد و اللوائح التي أبطلها قانون 2018..
وعدم الهيكل بخلي وزارة المالية ما تعترف بمرتبات الأساتذة ضمن الفصل الأول و بتدفع ليهم المرتب كدعم شهري ممكن يقيف او يتأخر او ينقص عادي (وقد كان)..
ويمكن تلاحظ في كل بيانات و منشورات لجنة لاجسو رافعين مطلبين بس هم هيكل مجاز و لائحة شروط خدمة معتمدة و لحدي هنا مافي اي كلام عن قروش ولا مخصصات .
عاوزين اللائحة البتقول لينا إنتو عليكم تشتغلوا كم ساعة و تعملوا شنو وبالمقابل الدولة تديكم شنو..
البتقرر الدولة تديهو أساتذة الجامعات لما يتحدد ضمن هيكل مجاز و يدخل في ميزانية الدولة ويكون مؤطر بلائحة معتمدة تاني ساهل نتفق على إنو يجيهم متين و كيف..
عشان كدة يا سعادة وزيرنا المبجل لو ضاعفت المرتب 15مرة و نص بدون ما تجيز الهيكل و اللائحة المشكلة ما اتحلت .
وقعت ليك ؟
(بالبلدي الفصيح – دكتور بلة تاج السر) .
