زيادة كبيرة المرتبات والمطرة جات ..

الخرطوم  : ون كليك نيوز

المثل بي يقول المرا كان بقت فاس ما بتشق الراس .. لكن بصراحة المثل ده ما ظابط ومتخلف كمان.. تقول لي كيف ؟

أقولك تعال شوف الحكاية دي واحكم براك  .

آمنة بت ميرغني جابوها محافظة لي بنك السودان عشان النسوان في ظنهم أكثر حرصا على الشفافية وإدارة المال ومنع الفساد  ..

يلا ..  لا حدي هنا حسن الظن حاجة كويسة.. لكن وأخ من لاكين دي ..

السيدة آمنة لما جات كان الدولار بي 3600 واليوم وهي لم تكمل الحول الدولار طار وبقى بي 6300 .. شوفوا الأرقام دي اتشغلبت كيف ؟

لا حدي هنا القصة ممكن تتبلع ونقول إنو زيادة الدولار ما مشكلة آمنة براها معاها ناس طيبين ومكنكشين..

نجي للحكاية المؤلمة  ..

تصدق يامؤمن إنو مرتب آمنة بت ميرغني ( في الشهر ) 44  مليون جنيه يعني 44 مليار ( عشان حذفوا الأصفار)

مش كده وبس عندها كمان بدل اجازة مرتب 8 شهور يعني 352 مليار  . وبدل عيدين مرتب 6 شهور يعني 264 مليار.  وبدل لبس 220  مليار  ( أصلها بي تلبس شنو ؟ مش ياهو التوب الواحد ده ؟ وعندها حافز سنوي 440 مليار ( هو بعد المرتب المتلتل ده كمان في حافز  ؟.. الله قادر ) . وإيه كمان تاني ؟ أيوا عندها بدل علاج 396 مليار وإيجار منزل 500 مليار.. وجاز حق بابور الكهرباء 24 مليار.

يعني لوحسبت الحكاية الطويلة دي ( ومن غير حسد ) بتلقى جملة الدخل الشهري للمرأة الحديدية البي تشق الرأس نصين عديل كدا 187.7 مليار جنيه ( في الشهر )

وبرضو تقول لي المرتبات مازادها والمطر ما جا ليه ؟ مش كفاية عليكم مطر القروش الفوق دي كلها ؟