الخرطوم : ون كليك نيوز
المثل بي يقول ( العندو الحنة بي يحنن ضنب جوادو ) والمثل ده تقريبا مطبق حرفيا على الجوز الفوق دا . تشوف الضحكة تقول الدولار بي عشرة جنيه.!!
طبعا وزير المالية ومحافظ بنك السودان أكتر اتنين في البلد دي مأمونين على قروشنا لكنهما قررا وبمساعدة ترزية القوانين ( وما أكثرهم) توزيع القروش حقتنا على الجميع وبدوا من كم يوم في الحكاية دي .
المحافظة لقت ليها لجنة ( ترزية ) تحت لافتة هيكلة المخصصات ولاشنو كده ما مهم وهبرت ليها مبلغ عشان تعدوا جنيه جنيه داير ليك كم شهر واحتمال ما تقدر زاتو وطبعا الزيت كان ما كفى البيت…. باقي الجماعة الكبار ألفي البنك المركزي أخدو الفيها النصيب برضو .وهكذا .
أما سيدنا جبرين فجماعة الترزية لقو ليهو بند اسمو ( حافز كوارث) اسم جميل برضو .. ورقعوا أي زول شغال في المالية بي خمسة مليار .. طبعا أكيد الوزير والجماعة الكبار كوارثم أكبر عشان كدا الهبرة حقتم بي تكون قدر الكارثة .
طيب ياجماعة المدرسين الدرسوا جبرين وآمنة ديل ما في ليهم بند كوارث برضو ؟؟ هو أصلا في كارثة أكتر من الوضع اللي هم فيهو دا؟؟
القصص دي لولا شمشرة الصحفيين ما كان في زول عارفا أصلا ومؤكد ما خفي كتييييير ..
سؤال تعسفي؟؟ ياربي البرهان عارف ولا زينا كده اتفاجأ؟؟
واحد من ظرفاء المدينة اقترح على كل ولاية تقسم قروشا بالتساوي على ناسا .
غايتو لو المقترح دا إتطبق في ناس بي تاكل قرض .
بالله عليكم لما يجي دورنا في القروش حقتنا صحونا من النوم ..
