الخرطوم : ون كليك نيوز
بالأمس في واحد من الأخبار العجيبة راحت في الزحمة بتاعت الحوار والنقة الكتيرة بتاعت السياسيين والتي لم تتوقف منذ الاستقلال لكنها ضجيج شايلو الهواء ساكت بدليل إنها أي النقة لم تقدم السودان سنتمتر واحد لي قدام .
المهم نرجع لي موضوعنا . الخبر بي يقول إنو الأردن أعادت تمساح من سلالة قابلة للانقراض الي السودان وبالفعل وصل ( التمساح) الي المطار وسريعا تم نقله الي حظيرة الدندر. وذلك في إطار التعاون بين البلدين . ( انتهى الخبر ) .
طيب ياجماعة التمساح المسكين ده بعد ما كان ضاربو الهمبريب بتاع الشام والبحر الميت وناس حنينين يقول ليهو ( تأبر ألبي ) تقبر قلبي وفي أمان الله. جايبنو للشقاوة لي شنو . هسة تقوم تقع فيه دانة ولا مسيّرة ولا يلمو فيهو جماعة يجاسفوه باكر نشوفو مقطع في حلة كبيرة وجلدو مشرور . أو في أحسن الحالات يتحول لي ورل أو سحلية من الجوع .. هو الناس لاقية تاكل خليك من التمساح .
غايتو جنش بشتنة عجيبة .. لكن ما عرفنا هو زاتو الوداهو الأردن شنو ؟ ياربي تكون رحلة علاجية ؟؟
المهم خلو بالكم من التمساح ياناس الدندر .
