الخرطوم : ون كليك نيوز
يا أيها الشعب السوداني الفضل.. إنتو عملتو شنو في الدنيا دي.. والله الواحد بقى يتمنى إنو الشمش دي ما تطلع زاتو .. معقولة كل صباح رحمن الواحد ما يقبل ليهو على أي محل إلا ويلقى زيادة جديدة .
هسي دي نحن بعد شوية شويتين ح نلقى نفسنا ( خارج منظومة البشر) أقولكم كيف؟ البضائع وأي خدمة انت تفكر فيها دايرة قروش متلتلة والناس قدر الشوية العندها بي يعملوا مباصرة كده نظام رزق اليوم باليوم.. لكن الخوف كلو من إنو الأسعار تواصل بالطريقه دي وقدر القريشات العندنا تروح شمار في مرقة .. طيب في الحالة نعمل شنو ؟
عبقرية بعض المنظرين في الحكومة قالت نثبت الدولار ده بي قفل تطبيق بنكك .. مثلا دي واحدة من الحلول والحيل التكتيكية وفي ناس آخرين قالو نقوم على تجار العملة والمهربين ندخلم الرج . ووووو …. الخ .
الله يرضى عليكم ويهديكم مافي دولار بي يحاربوهو بي قفل تطبيق والمساككة بتاعت التجار كان غيركم أشطر .
البي يرفع قيمة جنيهنا المسكين ده حاجة واحدة إنتو عارفنها كويس.. بس ما عندكم ليها كرعين .. دحين يا أخوانا المسعولين ما دام الحكاية دي غلبتكم لاحدي هنا كفاية قبل ما الفاس الوقع في الرأس يكمل شوية مابقي من الناس ..
دا سر اللعبة.. والعندو حلل تاني يلحقنا بيهو سريع ..
وكان الله في عون الشعب السوداني .
