الخرطوم : ون كليك نيوز
الكاتبالشاب سامي دفع الله يكتب ( ناشفه شديد ) :
واحد طلع برج الفاتح وداير ينتحر
(اصلا قبل الحرب مابقدر يدخلو) ورسلو ليهو واحد عشان يقنعوا ينزل وماينتحر
– شوف يامعلم انا خلاص اخدت قراري وحتلب انتحر فماتجي جمبي عشان مانقع الاتنين سوا
= عاين هنا انا ماجاي اناقشك في قرارك اكيد انت ماطالع فوق هنا عشان تستمتع بالمنظر
– وانت طالع هنا لشنو يعني؟
= عايز اشغل لايف في الفيسبوك حيجيب مشاهدات تقيلة
وشوف الخبر دا قال ليك بعد علاقة دامت ١٠ سنوات كريستيانو اتقدم لي جورجينا وهي وافقت
– انت بتقول في شنو؟
= بنت الحلال بتصبر وابن الحلال بوفي
– انا عارف حركاتكم دي بتتونس معاي عشان نتعارف وفي الاخر تقنعني اني ما اتلب
= تلب طوالي انت كنت قريبي مثلا
– شنو؟
= داير ادردم لي سفه اديك معاي لانو هناك ماحتلقاها تاني
– هناك وين؟
=انت قايل بعد تنتحر حتخش طب الخرطوم ماحتخش النار طوالي
– انت بتخوف فيني عشان ما انط صاح
= ياخ نط وريحنا
– يعني مافارق معاكم؟
= فارق مع منو اذا انت مافارق مع نفسك ولا اقول ليك الوطن محتاجك
– محتاجني انا؟
= ااي محتاجك عشان تدفع ليهو الضرائب والجبايات
ماشاء الله اللايف جايب مشاهدات تقيله اسمع دا واحد معلق قال ليك الوطن سفينه ممتلئه واذا لم يقفز منها بعض الركاب ستغرق
– دا قاصد شنو؟
= خليك منو كدي احكي لي مالك؟
– انا كنت داير انتحر من زمااان من زمن الدولار كان بي ١٧
= ايييك يعني من زمن الدولار كان قاصر
واسبابك شنو للانتحار؟؟
– اول شيء الحررررب
= *لا للحر لازم تبرد* سخنت عديييل
– تاني شيء مصنعي اتحرق واتنهب
= مصنع؟ انت زاتك غلطان تفتح مصنع هنا
هي البلد دي فيها انتاج
بلدنا دي مشهورة اكتر شئ بانتاج الحركات والشائعات وقروبات الواتساب
– وكمان الدعامه نهبوا البيت وسرقو عربيتي
= ياخ افرح عربيتك حسي بفتشوا بيها الديموقراطية
ياخ انت مشاكلك هينه انا قايلك حضرته فيديو كليب احمد الجقر ان شاء الله الاغاني كلها تكون زيها كدا عشان التوبة تبقى ساهله
– مرتي بعد طلبت الطلاق حسي كاتبه الجديد كبس والعدة الجديدة وصلت
= شغل بختلف
– ولدي جاب نسبه ٥٠٪ في الشهادة الثانويه
= طبعا النسبه دي مابتدخلو الا كلية التربيه
الكليه دي بقت زي *معسكرات النازحيين* بتدخلها بس لانو ماعندك حته تانية تخشها
– دي افلس ايام حياتي انا بقي عندي استريس شديد جدا
= استريس؟
الاستريس دا حق الناس المرطبه انت في حرب ومفلس ومنفسن انت قاعد في السودان الحاجات دي بتجيك اكسسوارات
– انا دايير امووووت
= شنو شابكنا داير اموت داير اموت انت قايل بعد تنط وتموت حتخش مقابر امبدة النموذجيه
– انا حاسس اني طولت في الحياة دي انا من زمن الرئيس فلان
= ااي الرئيس دا لسه في الحكم اصلا من علامات نضج الدوله انو الرئيس يموت وهو في الحكم
– انا زهجت من البشر
= لما تموت ان شاء الله حتتسال ٣ اسأله في القبر ولا سؤال فيهم بخص البشر مالك مركز معاهم
– ماقادر ماقادر
= شوف هنا انت لمن تموت هل متخيل طليقتك ترجع ليك ولا ولدك حيخش طب ولا الديموقراطية حترجع ليك عربيتك ولا مصنعك حيرجع ينتج من تاني ولا الجقر حيخلي الغناء
– اها اعمل شنو؟
= كدي انزل ونقعد بي رواقه كدا نخطط نعمل لينا حركه ولاحزب وكلها كم سنه ونخش السيادي ونرطب وامورنا توضح
– دا كلامك؟
= ااي تخش السيادي دا لافيهو شغل ولاتعب زي الممثل الصامت في المسلسلات
_ خلاص انا اقتنعت انا ما حنط
= ممتاز يلا ننزل وبعديها ياحبيب علي القسم عشان حتشوف النط الجد جد
– طيب والسيادي ؟
= لما تطلع من السجن ان شاء الله
*قاطعه عامه*
بقي علينا زي البقي علي *بقال* غلبه الدين وقهر الرجال وشماته الاعداء
لانو كلما ترتب اولوياتك بتطلع ليك اولويه بتخليك تولول من الاول
