الخرطوم : ون كليك نيوز
( هي قصة سيدة سودانية عبرت بحزن ووضوح كامل من خلال روايتها الشفافة التي لن نتدخل فيها بالتعديل ولكن ننقلها كما هي لتكون للنساء اعتبار وللرجال اعتذار ) وما قصة مقتل طبيبة مروي منكم/منكن ببعيد ..
الي تفاصيل القصة :
انا ناجية و لست ضحية
انا قررت أكسر حاجز الخوف من المجتمع و الرعب بتاع الصورة المثالية النحن مقيدين بيهو
قيد يخليك تصبر علي جريمة في حق نفسك و في نفس الوقت تطلع تواجه العالم و تقول
I’m ok و
I’m fine
لا نحن كنساء في ظل وجود ضكور البط المعنفين الجسدين ديل ما اوكي و لا بخير
أعلنت من فترة قريبة عن بودكاست اسموا #علمتني_آية ح اتكلم فيهوا عن تجاربي في الحياة و كان حق المرأة من الاحترام و التقدير و معرفة حقوقها جزء أصيل من البودكاست و حاليا هو في مرحلة الاعداد اذا بنا نموت قهرا يوم امس بوفاءة زميلة في الحقل الطبي غدرا علي يد طليقها
قررت اطلع و احكي تجربتي بالصور
عشان لو انقذت روح واحدة بس من الموت ح اكون فخورة يوم القيامة اني محسوبة في خانة و (من أحياها فكأنما أحيا الناس جميعا )
قبلي سنة ونص من الان
انا كان مفروض حالي يكون حال اي واحدة من الاخوات الحاليا فقدوا اروحهم ( ربنا يرحمهم و يغفر ليهم)
انا الطليقي ضربني بي كل قوة و قال لي انا ح أقتلك و جري المطبخ يجيب السكين و انا بسمع في صوت كركبتو وهو يفتش لي السكين في المطبخ انا قمت بي آخر نفس و و قفلت باب الغرفة علي و اتصلت علي الإسعاف و عشان يطلعوني اضطروا جابوا الدفاع المدني لانو حاول يكسر الباب عشان يقتلني و جوا أخدوني بين الموت و الحياة و اسعفوني و رموهوا في السجن لمدة ٦ اسابيع
يا اخواتي و يا اخواني
اي واحدة زوجها بعنفها جسديا او لفظيا او معنويا و المجتمع بيقول ليها اصبري انا آية دي بقول ليك إياك ثم إياك ثم إياك تصبري علي عنف
اصبري علي تقلبات الدنيا مع الرجل المهذب الخلوق المديك قدرك و مكانتك و محترمك اصبري معاه لي آخر يوم في الحياة
المجرم ما بصبروا معاه المجرم مكانو السجن و لا يصلح للزواج
المراءة عزيزة و مكرمة و مكرمها الله من سابع سماء بي سورة من اطول سور القران الكريم سورة النساء
و مكرمها النبي و مكرم من يكرمها ( ما أكرمهن الا كريم و ما أهانهن الا لئيم )
اي لئيم بهين مراءة واجب عليها تقيف و تدافع عن نفسها سواء كان عن طريق وليانها او عن طريق قانون او اي طريقة محترمة تجيب ليها حقها بعيدا عن رد العنف بالعنف
ربنا يوم القيامة ح يسألك من نفسك
يا اخواتي بت الرجال و اخت الرجال لا تهان
و اي مراءة قائمة بي دور الرجل و ماسكة صرفها و صرف عيالها و الزوج نااااااائم بقول ليها دي اول خطوات الانهيار و انو الزوج ح يعنفك و يقتلك في القريب العاجل
انا ما ضد منظومة الحياة مشاركة
لكن ما تلغي دور الرجل و تعفيه من مسؤلياتوا و تظلمي نفسك و تحمليها حمل ما حقها
( لا يكلف الله نفسا الا و سعها )
و انت عمروا ما كان وسعك انك تتحملي مسؤولية صرف و قوامة علي شؤن بيتك زي ما الرجل تماما ما وسعوا الحمل و الانجاب
انا واحدة من الناس الغلطوا و تتحملوا مسؤولية خمسة سنوات كااااااملة لي مسؤوليات ما حقتي و صحيت علي صوت السكين
المفروض كان توصلني لي نفس الطريق المجهول المعروف
انا مازلت رغم مرور قرابة السنة و نص من الموضوع دة الا انني بدفع في تمن الضرب علي الراس و لي الان بعاني منها و من اثارها
انا آية بي كامل طوعي و اختياري قررت اني اطلع و احكي تجربتي
و بي كامل طوعي و اختياري قررت انو اسمح لي البوست دة ينتشر و يشوفوا العالم كلو عشان يعرفوا
انو نحن كنساء لا نصلح للعنف و لا يصلح العنف لنا
اي واحدة بتتعرض للعنف دة وقت مناسب عشان تقول لا للعنف
و بوست لي اي رجل اختوا او بنتوا بتتعرض لي عنف يقيف في ضهرها و يبقي ليها حماية و سند من المجرم الللي هي عايشة معاهو
معاناة التعنيف و الضرب ما بعرف مرارتها الا انسان عاشها و انا عشتها و ما بتمني واحدة من اخواتي تعيشها
الا هل بلغت اللهم فأشهد
