المدارس بعد باكر : الوزير ده قاعد معانا ؟

الخرطوم  : ون كليك نيوز

بنزين مافي ولو لقيته ياجيت من الطلمبة مفلق وراسك مفتوح

* يادقشت السوق الاسود..

* انت وحظك..

* الجالون في الطلمبة اربعينات

* في الاسود يومك اسود

* صدق ممكن تخش الطلمبة عااادي لو لقيت طريقة ومافلقوك

* لو خشيت بي واسطة مثلا وبقيت سعيد وعانقت المسدس ممكن تكب بنزين بي خمسمية الف

* عااادي ويكون التنك لسه..

* بيسال هل من مزيد…

* كهرباء بتقطع في اليوم من تمنية الي عشرة ساعات

* ده يوميا..

* كل كم يوم بتبيت بدون كهرباء تقطع حداشر تجي اليوم التاني

* لوجات..

* الموية زي الكهرباء

* المواصلات بقت ميزانية

* ماشي الخرطوم وجاي شيل تلاتين الف

* ده بالحافلات..

* ترحال شيل ميتين الف ماشي جاي

* واشكر بتاع ترحال..

* رغيف ساااي اسرة صغيرة عايز ليك عشرين الف

* وجبتين عايز ليك مية الف..

* الطماطم الكيلو من سطاشر الي عشرين الف وعلي ذلك قس

* المدارس الخاصة الرسوم اتنين مليار

* بالترحيل الطالب بكلف تلاته مليار ونص

* الحكومي غالبا رسوم التسجيل المسمنها مساهمة بين خمسمية وسبعمية

* بالترحيل مليار ونص

وزير التربية مصر المدارس يوم الاحد وده خلي الاسر في وضع صعب

غالبا وزير التربية بتاعنا ما قاعد معانا يعني

* أو قاعد معانا زي كامل ادريس

المهم :  الله يكون في عون العنده اولاد في المدارس..

اولادنا حايمشوا المدارس كداري يعني مع البنزين المافي ده

حايقروا كيف مع الكهرباء المافي..

( أمير عبد الماجد) .