الخرطوم : ون كليك نيوز
أبو وضاح يكتب ( خلق الانسان في كبد ) :
أكعب حاجة انك تكتشف أن كلللل الناس الكبار الكانوا حولك كذبوا عليك
اهلك وقرايبك والمدرسين وكبار الحلة….
كللللهم يقولوا لك اقرأ واتعب هسع عشان ترتاح بعدين….
الكلام دا وانت في الابتدائي…..
والاسطوانة دي بي يشغلوها ليك لحدي ما تتخرج من الجامعة….
والغريبة يقولوا لك شوف الناس ال ما قروا تعبانين كيفن…
وانت تصدق….
اتعب هسع عشان بعدين ترتاح….
في النهاية تلقى يا مافي راحة يا مافي بعدين…..
ترتاح بعدين دي اسوأ كذبة مرت علي….
والله الواحد كان اخير له ينووووم ويتمطى ان شاءالله بعدين يشتغل عربجي….
لانه الواحد فينا في النهاية لقى روحو في نفس التعب الكان بخوفوهو منه….
يعني لا ارتحنا قبيل ولا ارتحنا بعدين….
انا غايتو اصلو ماب انصح لي طالبة والا طالب بانه يتعب هسع عشان يرتاح بعدين…..
خليهم يرتاحوا متى ما حبوا لانه من ناحية حا يتعبوا دي مافيها اتنين تلاتة…..
واصلو ماب اطمنهم انه في حاجة اسمها راحة…..
على قول الهنود : زندقي راحت كوچ ناهي ، (الدنيا مافيها راحة خالص)…
هو ياخي رب العالمين قال : (لقد خلقنا الانسان في كبد)
وقال : (خلق الانسان في كبد)
تجي انت تقول لي ترتاح بعدين؟…
ترتاح دي يعني مافي كبد ، ودا مخالف لخلق الله الذي ذكره في كتابه….
في كبد والله لامن كبدتك توجعك…
ما تسمع كلام الناس الأفاكين…..
الا هل بلغت…..
اللهم فاشهد….
مودات بالكوم…
📌ابووضاح📌
