الخرطوم : ون كليك نيوز
سامي دفع الله يكتب : ( وخير جليسٍ في الزمان ذكاء اصطناعي)
زمان كان الإنسان بعتمد في الحياة على عقلو او قلبو او مهاراتو او خبرة الناس اللي حواليهو
اما اليوم شات جي بي تي دخل في كل تفاصيل حياتنا
الراجل اذا داير يعرس بسال شات جي بي تي احسن البيضاء وطويله ولا الخَدْرَا وعيونها كباار
المرة في المطبخ تسال شات جي بي تي احلي ملاح ام رقيقه بايت ولاخدرة مفروكة وخصوصا الدنيا اخر شهر
ولا واحدة بتسالو متقدميين لي بنتي ودايراك تسال لي من اهل العريس اصلهم وفصلهم وساكنيين وين واتعشوا بي شنو وهل مرطبيين والعريس دا مهيتو كم؟
ولاشاب بسال كيف اوقف شبابي لحدي ما البلد تنعدل لانو شبابي رايح سااي
الغريبه رد الشات مرات بكون منطقي جدا لمن انت زاتك تتحير
شات جي بي تي عبارة عن مساعد ممتاز
و انعكاس لطريقة حياة معاصرة وسريعة ومتصلة ومليئة بالأسئلة التي تحتاج لإجابات فورية
نحن نختار أن نستعين به
لكنو حيفضل مجرد مساعد رقمي
لكن زي كل شيء في الحياة في جانب تاني الاعتماد المفرط على هذا الذكاء الرقمي بخلينا ننسى مهاراتنا الخاصة
ننسى كيف نكتب بأسلوبنا
كيف نبحث عن الإجابات بأنفسنا
العقل البشري والخبرة الشخصية هما ما يصنع القرار الحقيقي
فالاعتماد الكلي علي الذكاء الاصطناعي بخلينا ننسى قدرتنا على التفكير والإبداع عشان كدا يجب أن نستخدمه بحكمة ومانخليهو يتحكم في حياتنا اليومية.
*ناشفة*
طبعا انا هنا بتكلم عن دول العالم الثالث البتستخدم الذكاء الاصطناعي نحن ماتبعهم نحن هبطنا من المجموعه دي ماعارف حسي مصنفين دول عالم عاشر ولا طلعنا من التصنيف دا كلو لانو نحن حاليا في اولويات الحياة اليومية زي الاكل والكهرباء.
*قاطعة عامة*
واحد سال شات جي بي تي عن كيف اصبح مليونير في 10 دقايق فقط لانو مافي زمن.
السائل منتظر الاجابة وانا منتظر الاجابة وشات جي بي تي منتظر الاجابة.
