حكاية مأساوية عن ( جامعة سودانية )

الخرطوم  : ون كليك نيوز

كتب د بلة تاج السر  ( حكاية_من_جامعتنا ) :

حكاية العاصفة الكشفت الغطاء عن الكثير مما يجب أن يقف عليه المسؤولون لعلاجه إن كنا فعلا نسعى لتعليم عللي تقدمه مؤسسات أكاديمية محترمة ..

اكون كضاب لو قلت ليكم هي جامعة من جامعاتنا العريقة ولعلي لا أكون قاسي إن قلت أنها واحدة من جامعاتنا الملتقة..

سبعة الف طالب يتم قبولهم (حسب نظام الجامعة) من طلاب دفعة الصمود ٢٣ المؤجلة في مختلف فروع الجامعة و تخصصاتها و ما تطلع ليهم أرقام جامعية من التعليم العالي (دا ما موضوع ينسكت عليهو )

سألت أكتر من زول في الجامعة عن حكاية الطلاب القبلتوهم و ما جاتهم أرقام جامعية و خليتوهم معلقين مافي زول عاوز يوضح ليهم

ما فهمته أن هذه الجامعة عندها زي كل الجامعات مندوب في وزارة التعليم العالي (ودي اول مرة اسمع بيها) المندوب دا شغلته يجازف للجامعة فرص دراسات عليا حصة من التمويل نصيب في المقاعد. اي حاجة زي دي ..

وكل سنة المندوب كان بجازف ليهم حصة معتبرة من فرص القبول ويديهم إشعار مسموح ليكم تقبلوا في حدود كذا

الجامعة حسب نظامها (الما بشبه اي نظام في جامعاتنا العريقة او الغريقة ) تقوم توزع الفرص على الفروع و على التخصصات .

فتشرع الفروع في إجراءات القبول الخاضع للرقابة المركزية اي فرع كل يوم بيسالوهو استلمت أوراق كم طالب في كل تخصص وفي لحظة ما بقولو ليهو ستوب قفل على كدا

السنة دي إدارة الجامعة اختلفت مع (القائم او القائمة بأعمالها لدى الوزارة )

وقامت الحكاية جاطت عليهم الجامعة الملتقة فتحت التقديم و انهالت عليها الطلبات و الفروع كلها كان عليها إقبال شديد و مافي زول قال ليهم استوب

وحسب نظامهم المعولق اي طالب استلموا أوراقه خلاص قبلوهو

بعد مع كل التقديمات انتهت و حتى فرص الاعادة بقت ضيقة تكتشف إدارة الجامعة أن الأرقام الجامعية المصدقة لها لا تتجاوز ال 10% من الطلاب القالوا ليهم قبلناكم

إدارة الجامعة مضرة تلجأ للقائم بأعمالها و تعتذر ليهو و تخليهو يحاول يمرقها من الورطة دي

يقول أحد محدثي أن القائم بالأعمال بعد جهد جهيد و مجابدة و حاجات تانية قدر يجازف لينا زي 50% من الأرقام الجامعية المطلوبة و لا يزال هنالك حوالي 3 الف طالب مصيرهم مجهول لا في زول عاوز يشرح ليهم الحاصل و لا عندهم حل قدامهم إلا أن يقولوا بصوت واحد حسبنا الله و نعم الوكيل

#ملحوظة

إن بدت لك هذه الحكاية ملخبطة شوية فلأن الجامعة اصلا كلها وضعها ملخبط و ما مفهوم

موش في البداية قلت ليكم جامعة ملتقة!