الخرطوم : ون كليك نيوز
قبل يومين تلاتة كده اجتمع مجلس وزرانا المبجل وبعد تناول فطور مدنكل من مشاوي وقهاوي نظر في حال البلد البي يحنن العدو وقام طلع بي القرار الآتي :
قال أيه أجاز مشروع ( طرق بلا حفر ) وشكلوا لجنة عشان تدرس الموضوع وتشوف ليهو قريشات عشان تنفذو .
كلام جميل لكن .. أول حاجة البلد دي مافيها شوارع خالص والموجودة دي حقوا تخلوها للركشات والكوارو .. يعني دايرين ترقعوا ليكم جلابية مهرودة ؟؟
تاني حاجة مادام ما عندكم قروش للمشروع اجزتوهو لي شنو ؟
تالت حاجة وده المهم بي نقول ليكم الشوارع مهمة لكن الحفر الفيها هينة بي نشوف لينا طريقة نتزاوغ منها وتبقى عرباتنا زي الثعابين .. لكن نحن هسي في حفرة كبيرة ما قادرين نطلع منها عشان نشوف الشوارع دي زاتا لونا كيف ؟؟ ..
ياناس .. الجنيه قال الروب من العصر الشديد وكل يوم ماشي غاتس لي تحت والسوق طار وبقى ما في زول قاعد يمشي عليهو زاتو ..
دحين حفر الشوارع هينة أمرقونا من الحفرة النحن فيها دي .. ولا بعد كم يوم ما حا تلقوا شعب تطلعوا ليهو قرارات !!
