الجنيه داخل علي المحكمة .. دعواتكم

الخرطوم  : ون كليك نيوز

تقول الحكاية إن تلاتة مزارعين بعد الحصاد مبسوطين بشوالات القمح الحصدوها لكنهم قاعدين يتونسوا بقلقهم على المحصول من الحرامية و الآفات و المطر .

واحد منهم قال ليهم انا عندي فكرة .

حاج عثمان عنده مخزن كبير و الحرامية ما بيمشوا عليهو لانو عندو سلاح و عند حداشر ولد و كلبين نحن نمشي ليهو نتفق معاهو يخت لينا قمحنا دا عندو بالإيجار..

المهم بدون ما نطول في تفاصيل كتيرة شوالات القمح دخلت مخزن عثمان . و من باب الاحتياط حاج عثمان كتب ليهم ايصالات بعدد الشوالات كل شوال بايصال براهو كانوا خمسين شوال يعني خمسين ايصال..

عاوز ليك شوال يستلموا منك ايصالك واي زول في البيت يفتح ليك المخزن تشيل شوالك .

بعد شوية ظهر سلوك جديد إنو أصحاب الإيصالات لو عاوزين حاجة من اي تاجر يدوهو ايصال أو ايصالين حسب قيمة الحاجة العاوزنها و التاجر بدوره بدل يمشي يشيل القمح ممكن يمشي لتاجر تاني يديهو ايصالات ويشيل منو بضاعة كدة ايصالات عثمان بقت عملة متداولة و مبرئة للذمة بقيمة ثابتة الايصال يساوي شوال قمح

حاج عثمان لاحظ إنو ايصالاته دي بقت متداولة وحتى في واحدين يلاقوهو شايلين ايصالات ممزقة و مهرودة من كترة التداول يبدلها ليهم بايصالات جديدة..

الشيطان وسوس لحاج عثمان و بقى يكتب ايصالات ساكت و يمشي يشتري بيها مواد بناء أو بهايم أو اي حاجة محتاج ليها..

وبقت الإيصالات الحايمة في السوق اكتر من الشوالات الفي مخزن حاج عثمان..

اها شويتين كدة ظهروا شباب فنانين قلدوا خط عثمان المكعوج و نحتو ليهم ختم من حبة بطاطس و طلعوا ليهم ايصالات مضروبة وفكوها في السوق..

الناس انتبهت فجأة إنو حجم الإيصالات المتداولة اكبر من كمية القمح الممكن تكون مخزنة في عشرة مخازن زي مخزن عثمان..

بقوا يمشوا لي عثمان شايلين الإيصالات و مطالبين باستلام القمح و عثمان يتزاوغ مما اضطرهم لفتح بلاغات وتمت مداهمة مخزن عثمان..

كان فيهو ١٦ شوال ال١٦ ديل تبع عثمان براهو و البوليس عندو اكتر من ٣٠٠ ايصال مفتوح بيها بلاغات..

المهم محكمة العمد قضت بانو كل عشرة ايصالات تساوي شوال قمح (المال تلتو ولا كتلتو)..

الطاهر قال ليهو نان يا عمدة دا العشر ما التلت العمدة حكم عليهو بالغرامة تلاتة ايصالات عشان اتلاءم على المحكمة..

حاج عثمان حكمو عليهو بمصادرة ال١٦ شوال يعني ١٦٠ ايصال والسجن شهرين

والعمدة قال للناس خلاص ربنا يخلف عليكم..

حاج عثمان قام تاني عشان يدفع الغرامة و يحتفظ بباقي القمح كتب للمحكمة 16 إيصال جديدة

المهم :شكلو جنيهنا بقت عليهو حكاية ايصالات حاج عثمان .

( بالبلدي الفصيح  – دكتور بلة تاج السر  ).