الخرطوم : ون كليك نيوز
نحنا من 1956 لحدي 2026 عارفين غيرنا العملة كم مرة ؟ ولا مامهم البحصل لينا انو ماشين بنفس الدواء لكن شركة تانية وبنقرا من نفس الكتاب.
في 1956 تم اصدار أول جنيه سوداني بعد الاستغلال
وبعدها جات إصدارات رئيسية للعملة الورقية : 1956 – 1969 – 1970 – 1980 -1981 – 1985- 1986 – 1991-1991 – 2007
وفي 1992 حصل أكبر تغيير في اسم العملة . الجنيه اتبدل بالدينار وهنا في ناس طلعو برا عديل . مثلا 1 دينار = 10 جنيهات وفي 2007 اتلغى الدينار ورجع الجنيه السوداني الجديد .1 جنيه = 100 دينار والساقية لسه مدوره ورجعنا تاني للاصفار الكتيرة لانو في طباعة بدون تغطية وعندنا عحز كبيير في الميزان التجاري غير الفساد الفساد الفساد .
في 2024 تم تغير الـ500 والـ1000 جنيه والطبعة الجديدة طبعوها في روسيا بتكلفة كانت فوق 500مليون دولار غير الشحن والتأمين واتلاف العملات ده غير تعب الناس والجري من بنك لي بنك ومن ولاية لي ولاية عشان يحصلو يغيروها وكل يوم رواج فضل 48 ساعة فقط
طيب وقت ماعندكم خطة مجرجرين الشعب معاكم لشنو وصارفين من خزنة الدولة ٥٠٠ مليون دولار عشان تجو تحروقها في النهاية هو لعب عيال تقريبا يافشلة
نرجع لموضوعنا يعني من الاستقلال لحدي الآن العملناهو الجنيه القديم → الدينار → الجنيه الحالي نزيد ونحذف لكن السؤال الأهم : كم صرف السودان على كل تغيير وكل طبعة؟ ومن المسؤول عن قرار التغيير؟ وليه كل مرة بنغير الورق والمشكلة الاقتصادية لسه موجودة وبتكبر زياده ؟
تغيير العملة ما مفروض يكون مجرد تغيير ورق
المطلوب تغيير في السياسات والإدارة الاقتصادية عشان العملة الجديدة ما تلقى نفسها بعد سنوات في نفس مصير القديمة ونرجع للاصفار تاني . أرحمو الجنيه ده هو زاتو تعب واتهرد من كترة التغيير .
انتم لستم رجال للمرحلة لكن الفي قلبنا بنقولو ليكم والله غالب علي أمره
( مصعب الجاك ) .
