الخرطوم : ون كليك نيوز
بعد فترة نزوح طويله قضينها فى احد ولايات السودان، عدنا الى منزلنا فى العاصمه الخرطوم، ورجعنا بحماس شديد وظبطنا البيت ونظفناه واشترينا لينا شويه عفش واستقرينا.
وبعد كم يوم اتفاجأنا بانه ساكن معانا جوه البيت (فأر أبجقر) من النوع الكبير داك.. ومبغبغ وسمين قدر الارنب وعنده شنبات، لوشفته تحلف وتقول كان نازح فى مطعم بروست فى السعودية ورجع.
المهم المخلوق ده اتسلط علينا وعذبنا ليك عذاب الويل لمن نحنا ذاتنا (قولنا الرووب) يلم فى اى حاجه يقرمه ليك بسنونه، لا بيخلى ليه كيس بصل ولا كيس سلطه ولا عيش… اى حاجة فى المطبخ يلم فيها يدمرة.
والمشكله الكبيرة هو ماعارف أننا نحن راجعين من رحله نزوح مرهقه وبنقول يالطيف ولسه بنباصر فى امورنا بالعافيه، والشقى عايز يشاركنا فى حياتنا فى الظروف القاسيه دى، المهم انا احقد من الفار ده اصلا ما قابلنى فى حياتى خالص.
ياخ ده فات الدعامة فى المضرة بتاعتهم، قرم لينا هدومنا الفى الدولاب كلها، الفلاين بتاعتى جراها وحشرها جوه الجحر بتاعه، ليفة الحمام دخله الجحر بتاعه، اسلاك الكهرباء بتاعت التلاجة قرمضه لينا بأسنانه وبوظه لينا.
تحلف تقول ده بيته مابيتنا نحنا، من كترة ماهو ماخد راحته فيه بالكامل، وشغال ينطط فى البيت من غرفة لغرفة ومن سرير لسرير، انا أول مرة اشوف لى فار عينه قويه زى ده.
دخلنا ليك فى حسابات عجيبة مع الظروف الاقتصادية الصعبه دى، جبنا ليه شرك فار ابا يتقبض لينا، جبنا سم فار حلف ماياكله، لدرجه انى سعيت لى كديسه صحيت بالليل لقيته زاكيها فى الحوش والخايبه جاريه منه وخايفه.
قلنا يمكن ده يكون شيطان فتحنا قرآن فى البيت وبرضوه الحال فى حاله، بعدين عنده معاينه غريبه كدة لم يشوفك يقيف ويحدر ليك بعينه ومايجرى منك إلا انت تقرب منه شديد. نظام ده بيتى واتخارجوا لى من هنا وانتوا الرجعكم شنو؟
نحن فى حياتنا دى ذاتنا بقينا ماعارفين عملنا شنو؟ من دعاامه طلعونا من بيوتنا لفيران داخل بيوتنا، ماعارفين نلقها من منو ذاتنا.
انا وامى موجوعين منه والمغصة كتلانا، لانه امس اكتشفنا انه قرمض ملايات امى الجديدة والسمحه الادتها ليها خالتى حليمه وقالت ليها دى هديه منى ليك وفرشيها فى بيتكم لمن ترجعوا الخرطوم، وخربه ليها وخلاها ليها عامل زى مصفى الشاى كلها مقددة.
حبوبتى قالت لينا الله يدينى متل سنينات الفار الافه ده والقويات ديل عشان اقدر امضغ بهم اللحمه!
المهم اسى مفكرين نرحل ونخلى ليه البيت،
