الخرطوم : ون كليك نيوز
الإضراب كريه و نتن ..
لكن كمان الكضب و تزييف الحقائق مو مشكور ..
ومافي حاجة شينة في حق الأستاذ الجامعي أكتر من أن يطلع عليه طلابه و هو متورط لحدي إضنيهو في مستنقع الكضب ..
سيدي مدير جامعة (X) و سيدي عميد كلية (Z) إنتو لما تطلعوا ليكم بيان يقول أن أنشطة جامعتكم او كليتكم تسير على قدم و ساق في حين إنكم عارفين إنو أساتذتكم ممتنعين عن تنفيذ هذه الأنشطة على سبيل الإضراب المطلبي المعلن عاوزين تغشوا منو بالضبط؟ ..
وهل خاتين في بالكم أن طلابكم العارفين البير و غتاها شاهدين على إنو الكلام دا كضب
مجلس عمداء يطلع للميديا تقرير يفيد فيه بأن الأمور تمام التمام و طالب او أستاذ من نفس الجامعة يرفع لينا صورة من بورد الإعلانات بأنه قد تم تعليق الإمتحانات المعلنة
(نمتنع عن رفع الصور على سبيل الستر و الحفاظ على ما تبقى من احترام)
نخجل ليكم نحن ؟؟
الطلاب خلوهم ..
أولادكم و بناتكم في البيوت قاعدين تقولوا ليهم شنو وهم يطالعون كذبكم متمدد في ساحات الوسائط !
يا ناس إختشو ،المقاعد ما بتدوم ، والمناصب ضل ضحى ،و التاريخ ما بيرحم و الاختشو فاتو .
(بالبلدي الفصيح – د. بلة تاج السر).
