ون كليك نيوز : القاهرة
بتتذكّر موية غسيل العِدة البكشحوها قدّام البيوت؟
موية فيها (عضُم مكسّر) و(باقي رغيفة) و(نص ليمونة بايتة) و(بصلتين صغار كده متكورين)!
بتتذكّروها؟ والله أنا اشتقت ليها عديل.
أكتر حاجة حنينها كابسني، هي لمة العُرس السوداني في بيت شعبي مليان بـ (عمّات وخالات) و(أطفال متغاشين) ما ليهم عدد.
الدلوكة شغالة، وناس متلمين على خير.
نخيل الجرتق والعنقريب وصينية الحنة.
صوت عرفة لما تخمج في الدلوكة وتغنّي من قلبا.
صور محفورة في الروح.
الاستعداد للحفلة،
كشافات حمرا وبيضا،
العريس لابس (على الله جديدة)،
وأخته ماسكة التلفون في أضانُو، عشان يديهو محننه ، وبتكلم مع خالو في السعودية يبارك ليهو.
الضبيحة
التور
الخروف
نسوان الخدمة
الخضار
بوماستك العُرس والبوهية اللينة
المراتب الجديدة والملايات
المكوة في بيت العُرس
الجيران البدوك صالونهم بلا مقابل
خبيز العُرس
بلح الشام
بنات حلتنا السمحات طالعين في فرح وأناقة
كعب عالي
تعب
والضيوف الجايين مخصوص عشان العُرس
الزغاريد
ملاح التقيلة التقيل
الروب
والمرا البتعمل سلطة الأسود بضمير
ريحة البخور
العدة الجابوها من الجمعية
الاباريق
وصفاء وين؟
صفاء مع عبير وسارة وسلمى،
مشَوا سوق أمدرمان يجيبوا حاجات الحنة والهلال
بنات صغار، عمر الزهور، لابسات عبايات ومبسوطات
لا إرتكازات، لا تفتيش، لا همّ
أكوي لي جلابيتي
مطبقتي وين؟ ختيتا ما لقيتا
صالون الحلاقة
هبهان الشاي
أمل، هالة، سجى، وحنان في الكوفير من بدري شديد
كباية الشاي المجدوعة تحت شجرة الليمون
الكرسي الأحمر حق المناسبة
منو البدُق الصيوان؟
شوف مصعب وياسر وعوض،
عوض مع عمر بدقوا صيوان النسوان
عربية الزفة متزيّنة عديل
شُفع بتجارو بين الكراسي والكوانين
شوال الفحم
التلج
الزول البكسر التلج
الحافظة الكبيرة القاعدة جنب باب الشارع
مسجّل شغال بأعلى صوت
“يا الله يا حليلنا”
اعمامك الكبار قاعدين برة بيتونسوا ويضحكوا
ذكريات،
ويا ولد القهوة،
والشاي
سكرك كم؟
معلقة بس
نحن كل يوم بنموت
الموت ما طلقه
لا دانة
دي أرواحنا طالعة راجعة
أنا محمد، والله تعبت شديد
اشتقت للأهل
لصباحات الحلة
للمغرب
للعشاء
لا أولاد الدكاكين
وللباسطة
وللفتة
والعراقي
لو رجعنا، نلقى اللمة وين؟
منو البكشح موية غسيل عِدتنا وفيها (عضُم) مُستعمل؟
هم ما بس سرقوا البلد،
سرقوا الحياة
سرقوا حبنا
سرقوا روحنا
سرقوا السمح فينا
اللهم اسرق عافيتهم كما سرقونا… يا رب العالمين.
#الاء_ابراهيم
